ირაკლი ჩიქოვანი: ჩვენ ერთად უნდა გავაგრძელოთ მუშაობა და ერთად შევძლოთ ჩვენი ქვეყანა გავხადოთ ევროკავშირის და ნატოს წევრი სახელმწიფო

ძალიან მნიშვნელოვანი დღეა დღეს. მაგრამ გულწრფელად რომ ვთქვა და ყველამ ვაღიაროთ ამ ხელოვნური კრიზისის გამო, ამ დღემ 6 თვე დააგვიანა, - ასე გამოეხმაურა ოპოზიციის ნაწილის გადაწყვეტილებას საპარლამენტო საქმიანობაში მონაწილეობის მიღების შესახებ საპარლამენტო უმრავლესობის წევრი ირაკლი ჩიქოვანი.

„6 თვე დააგვიანა იმისათვის, რომ ამ ადამიანებს მონაწილეობა მიეღოთ იმ მთავარი პრობლემების გადასაწყვეტად, რომლებიც ჩვენი ქვეყნის წინაშე დგას, რომელიც დაკავშირებულია პანდემიასთან, რომელიც დაკავშირებულია იმ ეკონომიკურ კრიზისთან, რომელიც პანდემიას თან სდევს და მსოფლიოში მძვინვარებს და, რა თქმა უნდა, ზოგადად, ყველა იმ საკითხთან მიმართებაში, რომელიც ჩვენი ქვეყნისთვის წარმოადგენს გამოწვევას“, - განაცხადა ირაკლი ჩიქოვანმა.

მისი თქმით, აღნიშნულის მიუხედავად, პოზიციამ და ოპოზიციამ ნამდვილად ერთად უნდა გააგრძელოს მუშაობა იმისათვის, რომ ჩვენი ქვეყანა ერთობლივი ძალისხმევით გავხადოთ ევროკავშირის და ნატოს წევრი სახელმწიფო.

„აქვე მსურს შევეხო იმ დოკუმენტს, რომელზეც ისაუბრა ჩემმა კოლეგამ ნიკა სამხარაძემ. ეს დოკუმენტი არის ორპარტიული დოკუმენტი, რომელიც სენატში ინიცირდა, სადაც პირდაპირ არის საუბარი იმაზე, რომ საქართველომ ძალიან ბევრი და მნიშვნელოვანი რეფორმა გაატარა და მომავალშიც იმედი აქვთ, რომ წარმატებით გავატარებთ ამ რეფორმებს. მე მგონია, რომ ეს ნამდვილად არის აღიარება პოზიტიური და დადებითი შედეგებისა. აქვე მინდა ხაზი გავუსვა იმას, რომ გადაწყვეტილება „ქართული ოცნების“ მხრიდან, ხელი ყოფილიყო მოწერილი იმ დოკუმენტზე რომელიც შეიქმნა შარლ მიშელის მედიაციით, არის ის, რომ ჩვენ ვმართავთ ქვეყანას. მმართველი გუნდი, რომელიც მზად არის მიიღოს ის გადაწყვეტილებები, რომლებიც საჭირო და აუცილებელია ჩვენი ქვეყნის განვითარებისთვის.

დიახ, ჩვენი ქვეყნის განვითარებისთვის არის საჭირო და აუცილებელი, რომ ჩვენ კიდევ უფრო მეტად სრულყოფილი საარჩევნო სისტემა გვქონდეს, კიდევ უფრო მეტად სრულყოფილი საარჩევნო გარემო გვქონდეს და ზუსტად ამისთვის არის უკვე ინიცირებული ის დოკუმენტი, რომელიც აქ პარლამენტშია ინიცირებული და მინდა გითხრათ აქაც დაგაგვიანდათ, თუმცა ჩვენ მზად ვართ მიიღოთ ამ დოკუმენტის განხილვებში მონაწილეობა. ასევე, დაგაგვიანდათ იმისთვის, რომ ჩვენ კიდევ ერთხელ დავიწყოთ მუშაობა იმისთვის, რომ გამოვიძიოთ და გამოვიკვლიოთ ყველა ის გადაცდომა, თუ რომელიმე არსებობდა საარჩევნო პროცესში. ეს მზაობა აქედან არსებობს და შეგიძლიათ ამაშიც მიიღოთ მონაწილეობა.

კიდევ ერთხელ ვიმეორებ, ნაბიჯი ჩვენი მხრიდან გადადგმულია, გადადგმულია საქართველოს უკეთესი მომავლისაკენ, გადადგმულია იმისათვის რომ 2024 წელს ჩვენმა სახელმწიფომ მიიღოს შესაძლებლობა და ყველამ ერთად, არა მარტო ჩვენ, არამედ თქვენც, მივიღოთ გადაწყვეტილება და ევროკავშირს მივმართოთ ჩვენს სრულუფლებიან წევრობაზე. ეს არის მთავარი მიზანი, რომელიც ჩვენ უნდა გვამოძრავებდეს, ეს არის მთავარი გზავნილი“, - განაცხადა ირაკლი ჩიქოვანმა.

ოპოზიციური პარტიების წარმომადგენლები პარლამენტში მივიდნენ. ამით მე-10 მოწვევის პარლამენტისადმი მათი თითქმის 6-თვიანი ბოიკოტი დასრულდა.

სენატორებმა რიშმა, შაჰინმა და ჯონსონმა 19 აპრილის შეთანხმების სრულად შესრულების მხარდამჭერი ორპარტიული რეზოლუცია წარადგინეს.