სერგო ჩიხლაძე: ამნისტიის შესახებ ჩვენი ხედვა უკვე დარეგისტრირებულია, „ნაციონალურ მოძრაობას“ შეთანხმებაზე ხელი არ მოუწერია და, შესაბამისად, აქვთ განსხვავებული პოზიცია

„ნაციონალურ მოძრაობაში“ აცხადებენ, რომ ისინი შეეცდებიან, პარლამენტში განხილვაზე არ გავიდეს ოპოზიციის მიერ შექმნილი ამნისტიის შესახებ კანონპროექტი. ამის შესახებ „ქრონიკასთან“ საუბარში გიორგი ხვედელიანმა განაცხადა.

„ჩვენ ყველანაირად ვეცდებით ოპოზიციური ერთობა არ დავაზიანოთ, ამნისტიის ეს კანონპროექტი არ გავატანინოთ ამ ფორმით. ამ დოკუმენტში არის შესული ამნისტია, უნდა გავარკვიოთ როგორ რეალიზდება ამნისტია საბოლოო ჯამში. მე ნამდვილად მჯერა, რომ ძალიან მალე, როდესაც ნიკა მელია იქნება თავისუფლებაზე, ის დაასრულებს შეთანხმების პროცესს“, - აღნიშნა ხვედელიანმა.

„ნაციონალურ მოძრაობას“ განცხადებას „სტრატეგია აღმაშენებელში“ გამოეხმაურნენ. სერგო ჩიხლაძის თქმით, პარტია, რომელიც არ არის შარლ მიშელის შეთანხმების ხელმომწერი, უკვე ინიცირებულ კანონპროექტში ცვლილებებს ვერ შეიტანს.

„ჩვენი ხედვა უკვე შეტანილია, დარეგისტრირებულია და აქ არის გათვალისწინებული ყველა ხელმომწერის პოზიცია. „ნაციონალურ მოძრაობას“ შეთანხმებაზე ხელი არ მოუწერია და, შესაბამისად, აქვთ განსხვავებული პოზიცია. მაგრამ კიდევ ერთხელ ვადასტურებ - ჩვენ, „სტრატეგია აღმაშენებელი“, სხვა ხელმომწერი პარტიები, ერთგულნი ვართ ამ შეთანხმების, ავიღეთ პოლიტიკური პასუხისმგებლობა, არ გვეშინია კრიტიკის არც სხვა ოპოზიციური ძალების და არც საზოგადოების მხრიდან, იმიტომ რომ მიგვაჩნია, რომ ეს არის სწორი და პროცესი ბოლომდე უნდა მივიდეს“, - განაცხადა ჩიხლაძემ.

პარლამენტში ამნისტიის 2 კანონპროექტია დარეგისტრირებული - ერთი „ქართული ოცნების“, მეორე კი ოპოზიციის.