ანრი ოხანაშვილი ამნისტიაზე: ჩავაყენებთ საქმის კურსში პარტნიორებს, რათა არ მისცენ ვინმეს შეთანხმებიდან გასვლის შესაძლებლობა

პარლამენტის იურიდიულ საკითხთა კომიტეტის თავმჯდომარე ანრი ოხანაშვილი აცხადებს, რომ 20 ივნისის მოვლენების დროს დაკავებული ადამიანების ამნისტია „ქართული ოცნების“ ინტერესი და სურვილი იყო.

მისივე თქმით, მმართველ პარტიას რომ ასეთი სურვილი ჰქონოდა, ამას ბევრად ადრე გააკეთებდა.

„ჩვენ არაერთხელ გვითქვამს, რომ ამნისტიის პროექტის შემუშავება „ქართული ოცნების“ ინტერესი არ ყოფილა. ჩვენ რომ ასეთი სურვილი გვქონოდა, ამას გავაკეთებდით ბევრად ადრე. შესაბამისად, მარტივად იკვეთება, რომ ეს ამნისტია „ქართული ოცნების“ სუბიექტური ინტერესი არაა, თუმცა ჩვენ პატივს ვცემთ სტრატეგიული პარტნიორებს და იმ სწორ სულისკვეთებას, რომ პარტიებმა დაასრულონ ამ საკითხით მანიპულირება. ამიტომ საჭიროა, რომ ეს ფურცელი გადავშალოთ. მეტიც, თუკი ვინმემ ყველაზე მეტად უნდა აგოს პასუხი ამაზე პოლიტიკურად და მორალურად, ეს არის ნიკა მელია, რომელიც პარლამენტის შტურმით აღებას უწევდა ორგანიზებას. თუკი ვინმემ ყველაზე დიდი პასუხისმგებლობა უნდა იტვირთოს, ეს არის ნიკა მელია და მასთან სხვა ადამიანების გათანაბრება არის სრულიად მიუღებელი. ნიკა მელიას პასუხისმგებლობას და ყველა სხვა ადამიანის პასუხისმგებლობას ერთ სიბრტყეზე ვერ დავაყენებთ. ამიტომ წავედით კომპრომისზე, რომ ამნისტია შეეხოს ნიკა მელიასაც და სხვებსაც, მაგრამ თუ ახლა ვიღაც ამბობს, რომ „ყველა დარღვევა“ არ ნიშნავს ყველა დარღვევას, ეს არის წარმოუდგენელი. ჩვენ ვიმსჯელებთ ამ საკითხზე და ჩავაყენებთ საქმის კურსში სტრატეგიულ პარტნიორებს, რათა არ მისცენ ვინმეს შეთანხმებიდან გასვლის შესაძლებლობა“, - განაცხადა ოხანაშვილმა.

ადამიანის უფლებათა დაცვის კომიტეტმა „ამნისტიის შესახებ“ „ქართული ოცნების“ მიერ მომზადებულ კანონპროექტს პირველი მოსმენით მხარი დაუჭირა. რაც შეეხება ოპოზიციის მიერ მომზადებულ ალტერნატიულ კანონპროექტს, რომელიც შალვა შავგულიძემ წარადგინა, ის კენჭისყრაზე ჩავარდა.