ამერიკელი მეგობრები საქართველოს დამოუკიდებლობის დღეს ულოცავენ

საქართველოს დამოუკიდებლობის დღის აღსანიშნავად, მისალოცი გზავნილები გაავრცელეს, აშშ-ის როგორც აღმასრულებელი ასევე საკანონმდებლო ხელისუფლების წარმომადგენლებმა. ამის შესახებ ინფორმაცია აშშ-ში საქართველოს საელჩოს ვებგვერდზეა ხელმისაწვდომი.

ამერიკის შეერთებული შტატების პრეზიდენტმა ჯოზეფ ბაიდენმა პრემიერ-მინისტრ ირაკლი ღარიბაშვილს დამოუკიდებლობის დღესთან დაკავშირებით მისალოცი წერილი გაუგზავნა.

ჯოზეფ ბაიდენის მილოცვაში ნათქვამია, რომ ერთგული პარტნიორის რანგში, ამერიკის შეერთებული შტატები დემოკრატიული და ეკონომიკური განვითარების გზაზე ქართველი ხალხის მხარდაჭერას გააგრძელებს.

„ბატონო პრემიერ-მინისტრო! ამერიკელი ხალხის სახელით მსურს ქართველ ხალხს დამოუკიდებლობის დღე მივულოცო და 26 მაისს ბედნიერება და ჯანმრთელობა ვუსურვო.

ერთგული პარტნიორის რანგში, შეერთებული შტატები გააგრძელებს ქართველი ხალხის მხარდაჭერას მეტად დემოკრატიული და ეკონომიკური განვითარების გზაზე, რაც დამოუკიდებელი სასამართლოს და ინკლუზიური დემოკრატიული პროცესების გაძლიერებასაც გულისხმობს. ქართველი ხალხის გვერდით ვიქნებით ახალი კორონავირუსით გამოწვეული სოციალური და ეკონომიკური გავლენებისგან თავის დაღწევის მიმართულებით თქვენი ძალისხმევის გატარებისას.

ქართველი ერის დამოუკიდებლობის აღნიშვნა არ არის მხოლოდ საზეიმო თარიღი. ის იძლევა ისტორიის და ფასეულობების პატივისცემის შესაძლებლობას, რაც ერის ხასიათშია ჩაქსოვილი. ეს თარიღი იძლევა მომავალისკენ ხედვის შესაძლებლობასაც. როდესაც საქართველოს ლიდერები და მოქალაქეები ქვეყნის დამოუკიდებლობის გაძლიერებისა და ევრო-ატლანტიკური მისწრაფებების გზაზე დაწინაურებაზე ფიქრობთ, გახსოვდეთ, რომ შეერთებული შტატები თქვენს გვერდით დგას. შეერთებულ შტატებში მამაცი ქართველი ჯარისკაცების მადლიერნი ვართ, რადგან ისინი ავღანეთის ტერიტორიაზე ჩრდილო-ატლანტიკური ალიანსის პროგრამებში ჩვენი მეომრების გვერდში მსახურობენ და ჩვენ გავაგრძელებთ საქართველოს მხარდაჭერას ალიანსში გაწევრიანების პერიოდში.

ასევე ვაღიარებთ გარედან მომდინარე იმ გამოწვევების მნიშვნელობას, რაც საქართველოს აქვს. ქვეყანა განაგრძობს მათთან გამკლავებას. დღეს ჩემი ფიქრები მიმართულია ყველა იმ ადამიანისკენ, რომლებიც რუსეთის ოკუპაციის პირობებში ცხოვრობენ აფხაზეთსა და სამხრეთ ოსეთში. შეერთებული შტატები საქართველოს ტერიტორიული მთლიანობის და სუვერენიტეტის მტკიცედ ერთგული რჩება საერთაშორისოდ აღიარებულ საზღვრებში. დამოუკიდებლობის დღესთან დაკავშირებით მიიღეთ ჩემგან საუკეთესო სურვილები პირადად თქვენ და ქართველმა ხალხმა“, – ნათქვამია ჯოზეფ ბაიდენის მისალოც წერილში.

დამოუკიდებლობის დღე საქართველოს მიულოცა ასევე აშშ-ის სახელმწიფო დეპარტამენტმა, აშშ-ის თავდაცვის დეპარტამენტმა, კონგრესის საგარეო საქმეთა კომიტეტმა და საქართველოს მეგობრების ჯგუფის თანათავმჯდომარე კონგრესმენმა ჯერალდ კონოლიმ.

საქართველოს ასევე დამოუკიდებლობის დღე მიულოცა კონგრესმენმა დარენ სოტომ, სენატორმა ჯეიმს რიშმა, ჯორჯიის შტატის ეროვნულმა გვარდიამ.

ასევე, მისალოცი გზავნილები გაავრცელეს საქართველოს მეგობრებმა ვაშინგტონში მოქმედი პარტნიორი ორგანიზაციებიდან: ჯონათან კაცმა – German Marshall Fund of the United States-დან, მაიკლ კარპენტერმა – Penn Biden Center-დან, ალინა პოლიაკოვამ – Center for European Policy Analysis-დან და ალექსის მრაჩეკმა – The Heritage Foundation-დან. ასევე Caspian Policy Center -მა.