მარინა კალიურანდი: „ნაცმოძრაობამ“ მიშელის დოკუმენტს ხელი უნდა მოაწეროს, ეს არის კრიზისის დასრულების გზა

ევროპარლამენტარი მარინა კალიურანდი აცხადებს, რომ „ნაციონალურმა მოძრაობამ“ მიშელის დოკუმენტს ხელი უნდა მოაწეროს, ვინაიდან ეს არის პოლიტიკური კრიზისის დასრულების გზა. ამის შესახებ მან imedinews-თან საუბარში განაცხადა.

„ძალიან კარგია, რომ „ნაციონალური მოძრაობა“ პარლამენტში შედის, მაგრამ მათ მიშელის დოკუმენტს ხელი უნდა მოაწერონ. დიდი იმედი მაქვს, რომ ეს მოხდება. ევროპიდან ამდენი მოწოდების, რჩევისა და რეკომენდაციების შემდეგ მიხარია, რომ პარტიაში საქართველოს საკანონმდებლო ორგანოში შესვლის სასარგებლოდაა გადაწყვეტილება მიღებული. ევროპაში საქართველოს კეთილისმსურველები უკვე თვეებია ვამბობთ, რომ არჩეულმა პარლამენტარებმა უნდა შეასრულონ მანდატით დაკისრებული მოვალეობა. ეს წესია და დემოკრატიულ ქვეყნებში ასე ხდება. ჩვენ ვამბობდით და დღესაც ვაცხადებთ, რომ პოლიტიკოსებმა პარტიულ ინტერესებზე მაღლა უნდა დააყენონ ქვეყნის და ამომრჩევლის ინტერესები. ქართველმა ხალხმა გადაწყვიტა ეს არჩევნებზე და მას შემდეგ ამომრჩეველი ელოდება პარლამენტში მათი ნდობით აღჭურვილი პირების საქმიანობის დაწყებას. საქართველოს სჭირდება ძლიერი მმართველი გუნდი და ასევე დემოკრატიულ წყობას სჭირდება აქტიური და ძლიერი ოპოზიცია. საქართველოს სჭირდება კრიტიკული, მაგრამ კონსტრუქციული ოპოზიცია. უმნიშვნელოვანესია ევროკავშირის მედიაციით შედგენილ დოკუმენტზე ხელმოწერა. ხელმოწერაც არაა საკმარისი, რადგან ის, რაც ფურცელზე წერია, უნდა აღსრულდეს და ქართველ პოლიტიკოსებზეა დამოკიდებული. უფრო მეტს გეტყვით, აღსრულებაც არაა საკმარისი, რადგან ყველა პოლიტიკოსი სრულად უნდა იაზრებდეს და იზიარებდეს დოკუმენტის მნიშვნელობასთან ერთად ამ შეთანხმების სულისკვეთებას. მიზეზი მარტივია - ეს არის პოლიტიკური კრიზისის დასრულების გზა“, - განაცხადა მარინა კალიურანდიმ.

„ერთიანმა ნაციონალურმა მოძრაობამ“ პოლიტსაბჭოს სხდომაზე პარლამენტში შესვლის გადაწყვეტილება მიიღო. თუმცა, „ნაციონალური მოძრაობა“ ევროპული საბჭოს პრეზიდენტის, შარლ მიშელის მედიაციით გაფორმებულ შეთანხმებას ხელს არ აწერს.