სოზარ სუბარი: როდესაც სახალხო დამცველს არ მიეცა პანსიონში შესვლის უფლება, მაშინვე უნდა აეტეხა განგაში

სოზარ სუბარი მიიჩნევს, რომ ნინოწმინდის ბავშვთა პანსიონში სახალხო დამცველი აუცილებლად უნდა შეუშვან. საპარლამენტო უმრავლესობის წევრის, რეგიონული პოლიტიკისა და თვითმმართველობის კომიტეტის თავმჯდომარის თქმით, მისთვის გაუგებარია, რატომ გახდა საკითხი აქტუალური დღეს, მაშინ, როდესაც აღმოჩნდა, რომ ომბუდსმენს პანსიონში შესვლის საშუალება 2018 წლიდან არ აქვს.

მმართველი გუნდის დეპუტატი მიიჩნევს, რომ სახალხო დამცველს მაშინვე უნდა აეტეხა განგაში.

„როდესაც სახალხო დამცველს არ მიეცა შესვლის უფლება, მას მაშინვე უნდა აეტეხა განგაში, ამიტომ ეს სასწრაფოდ გამოსასწორებელია. თუმცა, რაც შეეხება რეაგირებას, შემიძლია გითხრათ, რომ ის 4 სისხლის სამართლის საქმე, რომელიც აღძრულია, ამ ოთხიდან ორი არის სწორედ ბავშვთა ზრუნვის სააგენტოს მიერ შესწავლილი და მათ მიერ გადაგზავნილი სამინისტროში, ხოლო ორი საქმე აღძრულია მას შემდეგ, რაც ბავშვები იქიდან წამოვიდნენ. მათ ამის შემდეგ თქვეს, რომ იქ არსებობდა გარკვეული პრობლემები“, - განაცხადა სოზარ სუბარმა.

ნინოწმინდის ბავშვთა პანსიონში, სავარაუდო ძალადობის შესახებ, თავად ბენეფიციარები „ქრონიკასთან“ ალაპარაკდნენ. ერთ-ერთი ასეთი ფაქტი, მათივე თქმით, ორი დღის წინ მოხდა. არასრულწლოვანები ამბობენ, რომ შემთხვევების შესახებ მეუფე სპირიდონი არ იყო ინფორმირებული, მათზე აღმზრდელები ზემოქმედებდნენ. რომელთა ნაწილი გათავისუფლებულია, თუმცა ნაწილი ისევ ადგილზე რჩება. კითხვაზე - იცოდა თუ არა მეუფე სპირიდონმა ამ ფაქტების შესახებ, ბავშვები ამბობენ, რომ მათ ვერ შეძლეს მეუფისთვის ეთქვათ, როგორ ძალადობდნენ მათზე აღმზრდელები და ასევე ვერ მოახერხეს, რომ ეს ამბავი ვინმესთვის ეთქვათ.

შსს-მ ნინოწმინდის ბავშვთა პანსიონში აღსაზრდელების მიმართ შესაძლო დანაშაულის ჩადენის ფაქტებზე გამოძიება დაიწყო.