ჯეიმს აპატურაი: როდესაც ნატო ამბობს, რომ მზად არის საქართველოსთან ერთად უფრო მეტი გააკეთოს, ქართველ ხალხს შეუძლია დარწმუნებული იყოს, რომ ეს ყველაფერი სრულდება

როდესაც ნატო ამბობს, რომ გვაქვს იდეები, ინიციატივები და მზადყოფნა საქართველოსთან ერთად უფრო მეტის გაკეთების, ქართველ ხალხს შეუძლია დარწმუნებული იყოს, რომ ეს ყველაფერი სრულდება, – ამის შესახებ კავკასიასა და ცენტრალურ აზიაში ნატო-ს გენერალური მდივნის სპეციალურმა წარმომადგენელმა, ჯეიმს აპატურაიმ განაცხადა.

„მე ვიქნები პირდაპირი და გეტყვით, რომ არა, მაპის საკითხი არ განხილულა სამიტზე, მაგრამ განხილვა შედგა საქართველოსა და უკრაინისთვის კონკრეტული დახმარების აღმოჩენის თაობაზე, რომელიც მათ წაწევს წინ ნატოს წევრობისკენ. ეს არის ჩვენი მიზანი. მაპი არა, უფრო კონკრეტული ნაბიჯებზე ვიმსჯელეთ და ეს ეხება მეტ დახმარებას, მეტ მხარდაჭერას, რეფორმებს, რეფორმების გატარების პროცესში ნატოს როლს და ამაზე მსჯელობას ვაგრძელებთ. დღეიდან აქტიურად ვიწყებთ იმპლემენტაციაზე მუშაობას. როდესაც ნატო ამბობს, რომ გვაქვს იდეები, ინიციატივები და მზადყოფნა საქართველოსთან ერთად უფრო მეტის გაკეთების, ქართველ ხალხს შეუძლია დარწმუნებული იყოს, რომ ეს ყველაფერი სრულდება. ამის უკვე ბევრი მაგალითი გვაქვს. ამის დადასტურებაა ერთობლივი ცენტრი, თავდაცვის აღმშენებლობის სკოლა, ერთობლივი წვრთნები. დეკლარაციაში ლიდერებმა ჩაწერეს, რომ ელოდებიან 2022 წელს დაგეგმილ სწავლებებს საქართველოს მონაწილეობით. ეს უკვე დაგეგმილია და კიდევ უფრო მეტი იქნება. ვიწყებთ ახალ ინიციატივებზე მუშაობას, რათა დავამატოთ ახალი ღონისძიებები. დღეს ვიწყებთ განხილვას, მაგრამ მონახაზი უკვე არის“, - აცხადებს ჯეიმს აპატურაი.