ანდრეი რუდენკო: გულწრფელად გითხრათ, გახელაძის ამბავი ჩვენთვის მთავარი თემა არ ყოფილა

გახელაძის ამბავი ჩვენთვის მთავარი თემა არ ყოფილა. ჩვენთვის მთავარი თემაა სამხრეთ კავკასიაში უსაფრთხოება და ცეცხლის არგამოყენებაზე დოკუმენტზე შეთანხმება, - ამის შესახებ რუსეთის საგარეო საქმეთა მინისტრის მოადგილემ, ანდრეი რუდენკომ ჟენევის მოლაპარაკებების 53-ე რაუნდის დასრულების შემდეგ, ჟურნალისტებს განუცხადა.

მისი თქმით, გახელაძის დაკავება რუსეთის ფედერაციის კომპეტენციას არ მიეკუთვნება.

„გულწრფელად გითხრათ, გახელაძის ამბავი ჩვენთვის მთავარი თემა არ ყოფილა. ჩვენთვის მთავარი თემაა სამხრეთ კავკასიაში უსაფრთხოება და ცეცხლის არგამოყენებაზე დოკუმენტზე შეთანხმება. თუ იქნება ამ კუთხით პროგრესი, მაშინ სხვა თემების მოგვარებაც მალე მოხდება. სამწუხაროდ, ამ თვალსაზრისით პროგრესი არ არის, თუმცა მონაწილეებს სურვილი გვაქვს ეს საკითხი გადავჭრათ.

გახელაძის საქმე განხილული იყო ფორმალურ შეხვედრებზეც და ორმხრივი კონტაქტების დროსაც. გახელაძის დაკავება არ მიეკუთვნება რუსეთის ფედერაციის კომპეტენციას. ეს სამხრეთ ოსეთის ხელისუფლების კომპეტენციაა. ჩვენ მოვუწოდეთ ქართულ მხარესა და სამხრეთ ოსეთს, იპოვონ გამოსავალი. თქვენ ძალიან კარგად იცით, რომ საკითხზე ჩვენ სხვა შეხედულება გვაქვს. ეფექტიან კონტროლს ჩვენ არსად ვახორციელებთ. სამხრეთ ოსეთი დამოუკიდებელი სახელმწიფოა და მათ ხელისუფლებასთან უნდა გაარკვიოთ. ჩვენ არ ვცნობთ სტრასბურგის გადაწყვეტილებას. ჩვენ არ ვიყენებთ ტერმინებს ოკუპირებული ტერიტორიები და არ მესმის, რაზე საუბრობთ. ცხინვალი არავის მიერ ოკუპირებული არ არის. გვაქვს შეთანხმება და ამ შეთანხმების საფუძველზე ვეხმარებით, მათ შორის სამხედრო კუთხითაც“, - განაცხადა რუსეთის საგარეო საქმეთა მინისტრის მოადგილემ.

ოკუპანტებმა ზაზა გახელაძე 2020 წლის 11 ივლისს დაჭრეს და დააკავეს. ოკუპირებული ცხინვალის ე.წ.-მა სასამართლომ, ზაზა გახელაძეს 12 წლითა და 6 თვით უკანონო პატიმრობა მიუსაჯა. მას ბრალდება რუსეთის ფედერაციის სისხლის სამართლის კოდექსის ორი მუხლით ედავებოდა: 317-ე მუხლით, რომელიც სამხედრო მოსამსახურის სიცოცხლის ხელყოფის მცდელობად კვალიფიცირდება და 322-ე მუხლით, რაც „სახელმწიფო საზღვრის უკანონოდ გადაკვეთას“ გულისხმობს.

ლაშა დარსალია ჟენევაში საერთაშორისო დისკუსიების 53-ე რაუნდის ფარგლებში იმყოფება.

ჟენევის საერთაშორისო მოლაპარაკებების ფორმატი 2008 წლის აგვისტოს ომის შემდეგ, ცეცხლის შეწყვეტის შეთანხმების შესაბამისად, საქართველოსა და რუსეთს შორის შეიქმნა. ეს არის ერთადერთი ფორმატი, სადაც რუსეთი და საქართველო პარტნიორებთან ერთად საუბრობენ.