გიორგი ბურჯანაძის განცხადებით, მოსამართლეების შერჩევის პროცესში ჩართვის ვალდებულება სახალხო დამცველს არ აქვს

სახალხო დამცველის მოადგილის, გიორგი ბურჯანაძის განცხადებით, მოსამართლეების შერჩევის პროცესში ჩართვის ვალდებულება სახალხო დამცველს არ აქვს.

„ვალდებულება არც პარლამენტის რეგლამენტში არსებობს და არც სახალხო დამცველის შესახებ ორგანულ კანონში და ბუნებრივია, აზრს არის მოკლებული ყოველგვარი განცხადება იმის შესახებ, რომ ჩვენ რაიმე ვალდებულება გვაქვს და ამ ვალდებულებას არ ვასრულებთ.

ჩვენი მონაწილეობა უზენაესი სასამართლოს მოსამართლეების არჩევის პროცესში ბუნებრივია მიზნად ისახავს იმას, რომ მეტი გამჭვირვალობა იყოს და მეტი კითხვა იყოს დასმული. მაგრამ, აქედან გამომდინარე, რომ ვნახეთ, ის ძირეული რეკომენდაციები, რომლებიც ჩვენ გვქონდა და არ გაითვალისწინეს, მიგვაჩნია, რომ დღეს არსებული გამოწვევების გათვალისწინებით ამ ეტაპზე აზრს არის მოკლებული ჩვენი მონაწილეობა.

მიგვაჩნია, რომ ამ ეტაპზე ეს პროცესი საერთოდ უნდა შეჩერდეს იმ შეთანხმების შესაბამისად, რომელიც პოლიტიკურ პარტიებს შორის გაფორმდა“, - განაცხადა სახალხო დამცველის მოადგილემ.

პარლამენტის იურიდიულ საკითხთა კომიტეტის ფარგლებში უზენაესი სასამართლოს მოსამართლეობის კანდიდატებთან დაკავშირებით შექმნილი სამუშაო ჯგუფი 2 ივლისს შეიკრიბება. ამასთანავე, სახალხო დამცველი პარლამენტში უზენაესი სასამართლოს მოსამართლეობის კანდიდატების მოსმენაში მონაწილეობას არ მიიღებს.