ინდოეთის საგარეო საქმეთა მინისტრი: შევთანხმდით, რომ წინსვლისთვის კიდევ უფრო მეტია გასაკეთებელი, რათა შენარჩუნდეს ეს დინამიკა

ინდოეთის საგარეო საქმეთა მინისტრის, სუბრაჰმანიამ ჯაიშანკარის განცხადებით, საქართველოში ინდოეთიდან ბევრი მნიშვნელოვანი ინვესტიცია განხორციელდა, 8000 ინდოელი სტუდენტი სწავლობს საქართველოში და 50000 ტურისტი ჩამოდის აქ. ამის შესახებ მან საქართველოს პრემიერ-მინისტრთან, ირაკლი ღარიბაშვილთან შეხვედრის შემდეგ განაცხადა.

„ძალიან მახარებს, რომ დღეს აქ ვარ. მე ვარ პირველი საგარეო საქმეთა მინისტრი ინდოეთიდან, რომელიც საქართველოს ეწვია, თუმცა საქართველოში ჩამოვედი იმ განწყობით, რომ განსაკუთრებული მისია ვიკისრო. როგორც ყველამ კარგად იცით, ჩვენ შევინახეთ და სათუთად გავუფრთხილდით საქართველოს ძალიან ძვირფას მადლს - მრავალწამებული ქეთევან დედოფლის წმინდა ნაწილებს. ბუნებრივია, გასაგები იყო დიდი ინტერესი საქართველოდან, ყველა ეს წმინდა ნაწილი მუდმივ მფლობელობაში რომ გადმოცემოდა ქვეყანას, რადგან მრავალწამებული დედოფალი ძალიან აღიარებულია თქვენს საზოგადოებაში. ჩვენი ძალიან მჭიდრო მეგობრობის და თანამშრომლობის კონტექსტში, ამ საკითხის მნიშვნელობის გაცნობიერების საფუძველზე, ჩვენმა პრემიერ-მინისტრმა გადაწყვიტა, რომ წმინდა ნაწილების ერთი ნაწილი გადმოცემოდა საქართველოს. ჩემთვის ძალიან დიდი პატივი და პრივილეგიაა, რომ პირადად ჩამომებრძანებინა ეს წმინდა ნაწილი და სულმოუთქმელად ველი, რომ დღეს გაიმართება ცერემონია სამების საკათედრო ტაძარში, სადაც ქვეყანას ოფიციალურად გადმოეცემა მრავალწამებული დედოფლის წმინდა ნაწილი. შეხვედრაზე, ასევე საქართველოს კათოლიკოსსაც ვიხილავ. ჩვენ ძალიან კარგი დისკუსია გვქონდა თქვენი კაბინეტის ბევრ წევრთან, განსაკუთრებით ვიცე-პრემიერთან და საგარეო საქმეთა მინისტრთან. ჩვენ სრულყოფილად მიმოვიხილეთ ორმხრივი თანამშრომლობის საკითხები. მიმაჩნია, რომ ბევრი რამით შეგვიძლია ვიყოთ კმაყოფილნი, ბევრი მნიშვნელოვანი ინვესტიცია განხორციელდა საქართველოში ინდოეთიდან. 8 000 სტუდენტი სწავლობს საქართველოში ინდოეთიდან და 50 000 ტურისტი ჩამოდის საქართველოში. მე ძალიან მახარებს, რომ ჩვენი ცნობილი ფილმებიც საქართველოში გადაღებულა. თუმცა, ჩვენ შევთანხმდით, რომ იმ წინსვლისთვის, რაც გაკეთდა საქართველოსა და ინდოეთს შორის, კიდევ უფრო მეტია გასაკეთებელი, რომ შენარჩუნდეს ეს დინამიკა და ორ მთავრობას შორის ძალიან აქცენტირებული თანამშრომლობა შედგეს. ამას მოუთმენლად ველი თქვენთან თანამშრომლობით“, - განაცხადა ინდოეთის საგარეო საქმეთა მინისტრმა.

სუბრაჰმანიან ჯაიშანკარმა ასევე აღნიშნა, რომ საუბარი შეეხო დაკავშირებადობის საკითხებს.

„დღეს ამ მცნებას, დაკავშირებადობას, ძალიან დიდი მნიშვნელობა აკისრია იმისთვის, რომ გაძლიერდეს და უფრო მდგრადი გახდეს ქვეყნები საერთაშორისო გადაზიდვების, იქნება ეს საზღვაო, სახმელეთო, თუ საჰაერო გადაზიდვების კუთხით და ბევრი სხვა ინფრასტრუქტურის გათვალისწინებით. ჩვენ მოწადინებულები ვართ, რომ ძალიან სწრაფი ტემპებით დავაჩქაროთ ჩვენი ურთიერთობა ამ მიმართულებით. ჩვენ მადლობას გიხდით ბატონო პრემიერ-მინისტრო, რომ ასე დიდ ყურადღებას აქცევთ ინდოეთიდან ჩამოსულ სტუდენტებს. ჩვენ ვიცით, რომ ბევრ შემთხვევაში ხელი ეწყობა მათ დაბრუნებას საქართველოში, ყოველი აკადემიური სემესტრის შემდეგ. მინდა მათი სახელით გადმოგცეთ ჩვენი ძალიან დიდი მადლიერება“, - აღნიშნა ინდოეთის საგარეო საქმეთა მინისტრმა.