გიგა ბოკერია პარლამენტში შესულ პარტიებს კვლავ საკანონმდებლო ორგანოს დატოვებისკენ მოუწოდებს

„ან ამ პარლამენტმა სწრაფად უნდა გადააყენოს ღარიბაშვილი, ან დემოკრატიულმა ოპოზიციამ უნდა დატოვოს ეს პარლამენტი. ვითარება უნდა იყოს მკაფიო ჩვენი ქვეყნის შიგნით ყველა მოქალაქისთვის და ქვეყნის გარეთ - საქართველოს თავისუფლების მხარდამჭერი პარტნიორისათვის“, - განაცხადა „ევროპული საქართველოს“ თავმჯდომარემ, გიგა ბოკერიამ, პარლამენტის წინ გამართულ ბრიფინგზე.

„ყველამ კარგად იცით, რომ „ევროპული საქართველოს“ პოზიცია, თავიდანვე, ამ პარლამენტთან დაკავშირებით, იყო მკაფიო, რომ ეს პარლამენტი არ გამოხატავს, ლეგიტიმურად, ჩვენი ქვეყნის საზოგადოების ნებას, მაგრამ მინდა, დავივიწყო ის დისკუსია, რომელიც მიმდინარეობდა 2020 წლის არჩევნების კრიზისის შემდეგ. როგორ უნდა მომხდარიყო ამ კრიზისის განმუხტვა, პარლამენტში შესვლით, შეთანხმების მიღწევით თუ არმიღწევით, ეს გადავდოთ გვერდით. ახლა, ამ ვითარებაში, ამ ჯოჯოხეთის შემდეგ, რაც ივანიშვილის რეჟიმმა და მისმა დამქაშებმა, სასულიერო პირებმა და პროპუტინისტურმა ძალებმა მოაწყვეს, ამ ტრაგედიის შემდეგ რაც მოხდა გუშინ, ჟურნალისტის გარდაცვალება, ამ საზიზღრობის შემდეგ, რაც მოაწყვეს ამის შემდეგ ამ გარდაცვალებასთან დაკავშირებით პროპაგანდის თვალსაზრისით ივანიშვილის რეჟიმმა, ერთადერთი ფუნქცია, რომელიც ამ პარლამენტმა შეიძლება შეასრულოს, არის ღარიბაშვილის გადაყენება. თუ ეს არ ხდება და ამის ვერანაირ წინაპირობას ვერ ვხედავთ, მაშინ, ამ პარლამენტში ნამდვილად არ არის დემოკრატიული ოპოზიციის ნაწილი. ამრიგად, მინდა, მოვუწოდო ჩვენს პარტნიორებს, რომელთანაც ადრეც გვქონია უთანხმოება, მაგრამ ახლა ეს უნდა დავივიწყოთ, ახლა, ერთადერთი რამ, რაც ამ შენობაში შეიძლება მოხდეს, არის ღარიბაშვილის გადაყენება“, - განაცხადა გიგა ბოკერიამ.