სალომე სამადაშვილი: გვაქვს განცდა, რომ ხელისუფლება საფრთხეს უქმნის მიშელის დოკუმენტის შესრულებას

ჩვენ გვაქვს განცდა, რომ ხელისუფლება საფრთხეს უქმნის მიშელის დოკუმენტის შესრულებას და იმ პოლიტიკური ამოცანების განხორციელებას, რასაც მიზნად ისახავდა ამ დოკუმენტის გაფორმება, - ამის შესახებ ევროპული საბჭოს პრეზიდენტის ოპოზიციასთან შეხვედრამდე სალომე სამადაშვილმა განაცხადა. დამოუკიდებელმა დეპუტატმა განმარტა, რა საკითხებზე იმსჯელებენ პოლიტიკოსები შარლ მიშელთან.

„ძალადობა ვიხილეთ მედიის წარმომადგენლების წინააღმდეგ. შესაბამისად, ცხადია, ჩვენი საუბრის თემა პირველ რიგში მიმდინარე პოლიტიკური მოვლენები იქნება. მაგრამ ამასთან ერთად ძალიან მნიშვნელოვანია, ევროპული საბჭოს პრეზიდენტს ესმოდეს, რა გამოწვევების წინაშე დგას ის დოკუმენტი, რომელსაც ხელი მოვაწერეთ და რომელსაც სწორედ მიშელის დოკუმენტი ჰქვია. თქვენ იცით, რომ ხელისუფლებამ დაარღვია ეს შეთანხმება. მაგალითად, როდესაც დანიშნა უზენაეს სასამართლოში მოსამართლეები. დაარღვია ეს შეთანხმება, როდესაც არ გაითვალისწინა ოპოზიციის პოზიციები რიგ საკითხებზე, როგორიც არის საარჩევნო რეფორმა“, - განაცხადა სამადაშვილმა.

ევროპული საბჭოს პრეზიდენტი, შარლ მიშელი, ბათუმში, ოპოზიციური პარტიების წარმომადგენლებს ხვდება. 19 აპრილის შეთანხმების ხელმომწერ პარტიებთან ერთად, შეხვედრას დაესწრება „ნაციონალური მოძრაობაც“.

ევროპული საბჭოს პრეზიდენტი, შარლ მიშელი საქართველოს 18 ივლისს ეწვია. ის ბათუმის მე-17 ყოველწლიურ საერთაშორისო კონფერენციაში მიიღებს მონაწილეობას. კონფერენციის ცენტრალური საკითხი ევროკავშირის სამ ასოცირებულ პარტნიორს – საქართველოს, მოლდოვასა და უკრაინას შორის გაღრმავებული თანამშრომლობა იქნება, რომლებმაც, ცოტა ხნის წინ, ასოცირებული სამეულის ფორმატი შექმნეს.

გარდა საქართველოს პრეზიდენტისა და პრემიერ-მინისტრისა, ის ბათუმში მოლდოვის რესპუბლიკის პრეზიდენტს, მაია სანდუსა და უკრაინის პრეზიდენტს, ვოლოდიმირ ზელენსკისაც შეხვდება.

ბათუმის მე-17 საერთაშორისო კონფერენციის პანელის წევრები ფიზიკურად დაესწრებიან, ხოლო აუდიტორია ვირტუალურად შეძლებს ღონისძიებაში მონაწილეობას. კონფერენციის მონაწილეთა სია იხილეთ ამ ბმულზე.