გურამ მაჭარაშვილი: არაერთი ვიზიტი საქართველოში, მათ შორის ევროსაბჭოს პრეზიდენტის ვიზიტიც ადასტურებს, რომ ჩვენი ქვეყანა აბსოლუტურად მზად არის, გახდეს ევროკავშირის წევრი

საპარლამენტო უმრავლესობის წევრის, გურამ მაჭარაშვილის განცხადებით, არაერთი ვიზიტი საქართველოში, მათ შორის ევროსაბჭოს პრეზიდენტის ახლანდელი ვიზიტიც ადასტურებს იმას, რომ ჩვენი ქვეყანა მზად არის, გახდეს ევროკავშირის წევრი.

მისი თქმით, ევროსაბჭოს პრეზიდენტის ვიზიტი იმის დასტურია, რომ საქართველოში არსებობს სრული რესურსი და თავსებადობა იმისა, რომ საქართველო იყოს ევროკავშირისა და ნატოს წევრი.

„ევროსაბჭოს პრეზიდენტის ვიზიტი კიდევ ერთი დასტურია იმის, რომ საქართველოში არსებობს სრული რესურსი და თავსებადობა იმისა, რომ საქართველო იყოს ევროკავშირისა და ნატოს წევრი. არაერთი ვიზიტი საქართველოში, მათ შორის ევროსაბჭოს პრეზიდენტის და ახლანდელი ვიზიტიც ადასტურებს იმას, რომ ჩვენი ქვეყანა აბსოლუტურად მზად არის იმისთვის, რომ გახდეს ევროკავშირის წევრი“, - განაცხადა გურამ მაჭარაშვილმა.

ევროპული საბჭოს პრეზიდენტი, შარლ მიშელი, ბათუმში, ოპოზიციური პარტიების წარმომადგენლებს ხვდება.

შარლ მიშელი საქართველოს 18 ივლისს ეწვია. დღეს ის ბათუმის მე-17 ყოველწლიურ საერთაშორისო კონფერენციაში მიიღებს მონაწილეობას. კონფერენციის ცენტრალური საკითხი ევროკავშირის სამ ასოცირებულ პარტნიორს – საქართველოს, მოლდოვასა და უკრაინას შორის გაღრმავებული თანამშრომლობა იქნება, რომლებმაც, ცოტა ხნის წინ, ასოცირებული სამეულის ფორმატი შექმნეს.

გარდა საქართველოს პრეზიდენტისა და პრემიერ-მინისტრისა, ის ბათუმში მოლდოვის რესპუბლიკის პრეზიდენტს, მაია სანდუსა და უკრაინის პრეზიდენტს, ვოლოდიმირ ზელენსკისაც შეხვდება.

ბათუმის მე-17 საერთაშორისო კონფერენციის პანელის წევრები ფიზიკურად დაესწრებიან, ხოლო აუდიტორია ვირტუალურად შეძლებს ღონისძიებაში მონაწილეობას. კონფერენციის მონაწილეთა სია იხილეთ ამ ბმულზე.