ირაკლი კობახიძე: არჩევნები არ გაყალბებულა, რაც კიდევ ერთხელ დაადასტურა დროებითი საგამოძიებო კომისიის დასკვნამ

„რეალურად არჩევნები არ გაყალბებულა, რაც კიდევ ერთხელ დაადასტურა იმ დასკვნამ, რომელიც წარმოადგინა დროებითმა საგამოძიებო კომისიამ“ - განაცხადა „ქართული ოცნების“ თავმჯდომარე ირაკლი კობახიძემ.

როგორც ირაკლი კობახიძემ აღნიშნა, ოპოზიციას ეშინოდა არჩევნების შესწავლის და სწორედ ამიტომ არ ჩაერთო საგამოძიებო კომისიის მუშაობაში.
მისივე თქმით, მნიშვნელოვანია თავიდან ბოლომდე ნათელი მოეფინოს იმას, თუ რა მოხდა 2020 წლის საპარლამენტო არჩევნებზე დარამდენად ჰქონდა თუნდაც, მინიმალური საფუძველი იმ საბოტაჟს, რომელიც განხორციელდა რადიკალური ოპოზიციის მხრიდან.

„როდესაც ოპოზიციამ საუბარი დაიწყო არჩევნების გაყალბებასთან დაკავშირებით, ჩვენ მათ წარვუდგინეთ 4 სხვადასხვა შეთავაზება. პირველი - ეს იყო გადათვლა - ჩვენ შევთავაზეთ 200-ზე მეტი საარჩევნო უბნის გადათვლა ჯერ კიდევ ნოემბერში, მოლაპარაკებების მეორე რაუნდის დროს, რაც არასდროს არ მომხდარა საარჩევნო პროცესში; მეორე - ჩვენ მათ შევთავაზეთ 3700-ივე უბნიდან ამოღებული ვიდეო-ჩანაწერების ნახვა. ამაზეც თქვეს უარი, როცა საუბარი იყო ე.წ. კარუსელზე, ძალიან მარტივად შეიძლებოდა ამ ჩანაწერებით იმის გადამოწმება, თუ რამდენად ჰქონდა რეალურად ადგილი ასეთ სამართალდარღვევას. მესამე - ჩვენ მათ შევთავაზეთ სატელევიზიო დებატები ყველა იმ საკითხთან დაკავშირებით, რომელიც შეიძლებოდა ყოფილიყო დაკავშირებული საარჩევნო პროცესთან და მეოთხე - შევთავაზეთ საგამოძიებო კომისიის შექმნა, იმ კომისიის შექმნა, რომელიც შემდეგ, რეალურად, შეიქმნა, თუმცა, ოთხივე შემოთავაზებაზე მივიღეთ საჯარო უარი. როგორც ირკვევა, ამას ჰქონდა ძალიან მარტივი მიზეზი - მათ სათქმელი არაფერი აქვთ. კითხვებსაც კი ვერ სვამენ, ვერ ერთვებიან დებატებში. ამის მთავარი მიზეზი არის ის, რომ რეალურად, არჩევნები არ გაყალბებულა, რაც კიდევ ერთხელ დაადასტურა იმ დასკვნამ, რომელიც წარმოადგინა დროებითმა საგამოძიებო კომისიამ. მათ ეშინოდათ არჩევნების შესწავლის, სწორედ ამიტომ არ ჩაერთენ საგამოძიებო კომისიის მუშაობაში.“ - განაცხადა ირაკლი კობახიძემ.
მისივე თქმით, საგამოძიებო კომისიის მუშაობაში ოპოზიციის ჩართვის სურვილი საერთაშორისო პარტნიორებმა გამოთქვეს.

„კარგი იქნებოდა, კომისია შეგვექმნა წლის დასაწყისშივე, თუმცა, ჩვენ გვქონდა ამაზე კონსულტაციები საერთაშორისო პარტნიორებთან და მათ გვთხოვეს საგამოძიებო კომისიის შექმნის გადადება და მიზეზი იყო ის, რომ მათი სურვილი იყო, ოპოზიცია ჩართულიყო საგამოძიებო კომისიის მუშაობაში. ჩვენ გავითვალისწინეთ საერთაშორისო პარტნიორების ეს თხოვნა და გადავწიეთ საგამოძიებო კომისიის შექმნა და ეს კომისია შეიქმნა მხოლოდ მას შემდეგ, რაც ხელი მოეწერა 19 აპრილის შეთანხმებას, თუმცა, ამის მიუხედავად, ოპოზიციამ მაინც თქვა უარი საგამოძიებო კომისიის მუშაობაში ჩართვაზე. ყველაფერი თავის თავზე მეტყველებს. მთავარი მიზეზი არის ის, რომ რეალურად, ოპოზიციას არ ჰქონდა არაფერი სათქმელი არჩევნებთან დაკავშირებით“ - განაცხადა ირაკლი კობახიძემ.