არჩილ თალაკვაძე: ერთადერთი დაბრუნება, რაც სააკაშვილს შეუძლია, არის, წარდგეს მართლმსაჯულების წინაშე და ეს ადრე თუ გვიან ასეც მოხდება

საქართველოში ყოველწლიურად მილიონობით ადამიანი ჩამოდის და მათ შორის არცერთი მიხეილ სააკაშვილი და არც ერთხელ მიხეილ სააკაშვილი არ ჩამოსულა, იმიტომ რომ მას აქვს პრობლემები კანონთან და საქართველოს სახელმწიფოსთან. მან უარი თქვა მოქალაქეობაზე და დღემდე უკრაინიდან უკანონო ჩარევას ახორციელებს პოლიტიკურ პროცესსა და არჩევნებში, - ამის შესახებ პარლამენტის ვიცე-სპიკერმა, არჩილ თალაკვაძემ მიხეილ სააკაშვილის განცხადების შეფასებისას „ქრონიკას“ განუცხადა.

მისი თქმით, მიხეილ სააკაშვილი უკრაინის მოქალაქეებსაც ატყუებს, როდესაც ეუბნება, რომ იგი სხვებზე მეტი უკრაინელია და სხვებზე მეტად უყვარს ქვეყანა. თალაკვაძემ განმარტა, რომ სააკაშვილი იმავეს აკეთებდა საქართველოშიც. მოქალაქეებს არწმუნებდა, რომ ქვეყნის დიდი პატრიოტი იყო და ამავე დროს მათ საკუთრებას ართმევდა, უფლებებს ულახავდა, ბიზნესსა და ტელევიზიებს რეკეტს ეწეოდა.

„რაც შეეხება მის დაპირებას, ამის უკან ორი რამ დგას. მას მართლაც უნდა დაბრუნება კანონის გვერდის ავლით და ასევე სურს ძალაუფლება როგორმე დაიბრუნოს საარჩევნო ყუის გვერდის ავლით. ყველა მცდელობა, რაც დღემდე იყო, მისი მოწოდებები - ავიღოთ იარაღი, დავამხოთ ხელისუფლება, ავადუღოთ სამეგრელო, ყველა ეს მესიჯები ერთმანეთთანაა დაკავშირებული, როგორც არეულობისა და დესტაბილიზაციის გზავნილი საკუთარი მხარდამჭერებისა და პარტიის მისამართით.

ეს მისი ახლანდელი ანონსიც მაღალი ალბათობით კიდევ ერთხელ ადასტურებს, რომ მას მართლაც სურდა წინა თვეებში, ამ წლის დასაწყისში ჩამოსვლა და სურდა სწორედ დესტაბილიზაციური სცენარით, რომელზეც ჩვენ შემდეგ გაგვიჩნდა კითხვები, რაზეც „ქართული ოცნების“ ლიდერები ღიად ვსაუბრობდით“, - განაცხადა თალაკვაძემ.

მისი თქმით, სააკაშვილი საქართველოში ჩამოსვლასა და დესტაბილიზაციას ვერ შეძლებს, რადგან ამისთვის მას სჭირდება ხელისუფლებაში დასაყრდენი და დესტაბილიზაცია.

„მას სჭირდება ქვეყანაში არეულობის ფონი და დესტაბილიზაცია, რასაც ცდილობს. „ქართულმა ოცნებამ“ ყველა ჯერზე აღკვეთა ასეთი მცდელობები. ჩვენ არ დავუშვებთ არც იმას, რომ სახელისუფლებო სტრუქტურებიდან ვინმემ, მაღალი თუ დაბალი თანამდებობის პირმა, სცადოს და ხელი შეუწყოს მიხეილ სააკაშვილს ასე დაბრუნებაში. ერთადერთი დაბრუნება, რაც მას შეუძლია, არის ის, რომ წარდგეს მართლმსაჯულების წინაშე და ეს ადრე თუ გვიან ასეც მოხდება“, - განაცხადა პარლამენტის ვიცე-სპიკერმა, არჩილ თალაკვაძემ.

საქართველოს ყოფილმა პრეზიდენტმა მიხეილ სააკაშვილმა თვითმმართველობის არჩევნებზე საქართველოში ჩამოსვლა კიდევ ერთხელ დააანონსა.