ზაზა გულიაშვილი ოპერატორის დაშავებაზე: ის არავის არ გადაუგდია - კადრის შორიდან გადაღება უნდოდა და ძალიან დაბალ მოაჯირს მიეყუდა

ქარელის მერობის კანდიდატი ზაზა გულიაშვილი, რომელიც „ქართული ოცნების“ ქარელის ოფისში მომხდარ შემთხვევას შეესწრო, აცხადებს, რომ ოპერატორი ვინმეს ზეწოლის შედეგად არ გადავარდნილა მოაჯირიდან.

„ოფისში ვიყავი, როცა ჟურნალისტი და ოპერატორი შემოცვივდნენ. მათ არც ლოგო ჰქონდათ და არც რაიმე სიმბოლო, რომ რომელიმე ტელევიზიიდან იყვნენ, მაგრამ მერე აღმოჩნდა, რომ „მთავარის“ ჟურნალისტი და ოპერატორი ყოფილან. შემოვიდნენ უწმაწური სიტყვებით, თავხედურად. ჩვენი შტაბის თანამშრომლებმა გარეთ გასვლისკენ მოუწოდეს. ჩვენ ოფისი შენობის მეორე სართულზე გვაქვს. იქ არის ვიწრო ამოსასვლელი, რომელსაც მოაჯირი მოსდევს. როცა ხმაური მომესმა, ჟალუზი ავწიე და დავინახე, რომ ოპერატორი უკან-უკან მოდიოდა“, - ამბობს მერობის კანდიდატი.

კითხვაზე, არსებობდა თუ არა რაიმე საფრთხე, რის გამოც, შეიძლებოდა, ოპერატორს, კამერით ხელში, უკუსვლით ემოძრავა, ზაზა გულიაშვილი ამბობს:

„არაფერი საფრთხე არ ემუქრებოდა. უბრალოდ, ჩვენი შტაბის თანამშრომლები ეუბნებოდნენ, რომ ჩასულიყვნენ აივნიდან, ჩვენი ტერიტორია დაეტოვებინათ და გარედან გადაეღოთ კადრები. არავის არ გადაუგდია. თავად წავიდა უკან-უკან. უნდოდა, კადრი შორიდან გადაეღო. იქ არის ძალიან დაბალი მოაჯირი, კიბის და არა აივნის მოაჯირი. დაახლოებით, 50 სანტიმეტრამდე სიმაღლისაა. როცა 50-სანტიმეტრიან მოაჯირს მიეყუდა, ძალიან დიდი კამერა ეჭირა. პირადად დავინახე და ჩემ თვალწინ მოხდა ეს ყველაფერი, ვინმეს მონაყოლს არ ვყვები. შიგნიდან დავიყვირე, ფრთხილად - მეთქი. ფანჯარა დახურული იყო და ალბათ, ის ჩემს დაძახებას ვერ გაიგებდა. როცა უკან წავიდა, მოაჯირს ფეხებით მიეყუდა, კიდე უნდოდა ნაბიჯების გადადგმა და უკან რომ გაიწია, მოაჯირმა არ გაუშვა და კამერამ გადაძალა“.

მისივე თქმით, გადავარდნის შემდეგ, ოპერატორს გონება არ დაუკარგავს და საკუთარი ფეხით გავიდა ტერიტორიიდან.

„მთავარმა არხმა“ გაავრცელა ინფორმაცია, რომ მათი ოპერატორი ლევან აბლოთია „ქართული ოცნების“ ქარელის შტაბის წარმომადგენლებმა მეორე სართულიდან გადააგდეს, რასაც მმართველ პარტიაში გამოეხმაურნენ და განაცხადეს, რომ ეს ფაქტი სიმართლეს არ შეესაბამება. ლევან აბლოთიას ჯანმრთელობის მდგომარეობა სტაბილურია, ის საავადმყოფოდან უკვე გაწერეს.