პენსმა თბილისში განცდილ ემოციებზე ილაპარაკა

აშშ-ის პრეზიდენტმა მაიკ პენსმა ამერიკული დელეგაციისადმი მიძღვნილ ვახშამზე განაცხადა, რომ მისთვის ემოციური იყო ქართული და ამერიკული დროშებით მოფრიალე მოქალაქეების დანახვა. 

"დღეს ჩვენ აღვნიშნავთ ჩვენს პარტნიორობას და მეგობრობას. ჩვენ წინ გაშლილი მადისმომგვრელი ქართული სუფრა ზუსტად ისეთი მომხიბვლელი და სასიამოვნოა, როგორც მსმენია. ასე რომ, მადლობას მოგახსენებთ გულითადი მასპინძლობისთვის. მე და ჩემი მეუღლე მადლობელნი ვართ ქართული ლეგენდარული სამზარეულოს დაგემოვნების შესაძლებლობისთვის და თბილი მიღებისთვის. კერძები, სიმღერა, ცეკვა, რომლებითაც ჩვენ მალე დავტკბებით უბრალოდ საუცხოოა, ისევე საუცხოო, როგორც ყველაფერი თქვენს ქვეყანაში და ჩვენ მადლობას მოგახსენებთ გაზიარებისთვის. 

ათასწლეულების განმავლობაში ქართველებმა დაამტკიცეს თავიანთი ვაჟკაცობა, დამოუკიდებლობის სიყვარული, რომ ისინი მზად არიან იბრძოლონ იმისთვის, რაც სწამთ, იბრძოლონ ბოლომდე. ამ მხრივ, თქვენ გამოგარჩევთ ჩვენი მიწისთვის დამახასიათებელი სულისკვეთება, დამოუკიდებლობის სულისკვეთება, რომელიც საერთოა ქართველებისა და ამერიკელებისთვის. 

როგორც კი თქვენს ქალაქში ჩამოვფრინდით, ჩემზე და კერენზე უდიდესი ემოციური გავლენა იქონია მოქალაქეთა ხილვამ, რომლებიც ამერიკული და ქართული დროშების ფრიალით დაგვხვდნენ. ამან მართლაც მძლავრი ემოციები აღძრა ჩვენში. მე ქართველი ხალხი გავიცანი თქვენი სახით. ასე რომ, ეჭვი არ მეპარება, რომ ჩვენ შორის არსებული ძლიერი კავშირები და თავისუფლებისა და დამოუკიდებლობის სიყვარული კიდევ უფრო განმტკიცდება თქვენი და პრეზიდენტ დონალდ ტრამპის ხელმძღვანელობით. ასე რომ, მადლობას მოგახსენებთ გულთბილი მასპინძლობისთვის. 

ჩემთვის უდიდესი პატივია, წარმოვადგენდე ამერიკის შეერთებულ შტატებს ამ დიდი ისტორიის მქონე უძველეს ქვეყანაში", - განაცხადა მაიკ პენსმა.

აშშ-ის ვიცეპრეზიდენტი მაიკ პენსი ესტონეთიდან საქართველოში გამოემგზავრა. მას თბილისის საერთაშორისო აეროპორტში პრემიერი გიორგი კვირიკაშვილი დახვდა. მოგვიანებით, გიორგი კვირიკაშვილმა, მეუღლესთან ერთად, აშშ-ის ვიცეპრეზიდენტსა და ამერიკის დელეგაციას ოფიციალურ ვახშამზე უმასპინძლა. კვირიკაშვილმა პენსს კოსმოსში ჩაკრულოს გაშვების ისტორიაც უამბო.