საქართველოს მასშტაბით ყველა საარჩევნო უბანი დაიხურა

საქართველოს მასშტაბით ადგილობრივი თვითმმართველობის არჩევნებისთვის კენჭისყრის პროცედურა დასრულდა. ამომრჩეველს ხმის მიცემის უფლება 20:00 საათამდე ჰქონდა.

არჩევნებისთვის საქართველოში 3664 საარჩევნო უბანი ფუნქციონირებდა. ამომრჩეველთა ერთიან სიაში კი 3 497 345 ამომრჩეველი იყო, მათ შორის სტაციონარულ სამკურნალო დაწესებულებებსა და იზოლაციაში (კარანტინი, თვითიზოლაცია) მყოფი ამომრჩევლების არჩევნებში მონაწილეობის მიზნით 70 საარჩევნო უბანი იყო შექმნილი, პენიტენციურ დაწესებულებებში კი - 9 უბანი.

2 ოქტომბრის არჩევნებისთვის რეგისტრირებულია 43 საარჩევნო სუბიექტი. ამომრჩევლებმა აირჩიეს 64 საკრებულოს 2068 წევრი (როგორც პროპორციული, ისე მაჟორიტარული წესით) და 64 მერი.

არჩევნების წინასწარ პირველად შედეგებს ცესკო საარჩევნო უბნების დახურვიდან 7-8 საათში გამოაქვეყნებს, არჩევნების შედეგების შემაჯამებელი ოქმი კი არაუგვიანეს 16 ოქტომბრისა უნდა გამოქვეყნდეს. აუცილებლობის შემთხვევაში არჩევნების მეორე ტურები კენჭისყრის დღიდან მეოთხე შაბათს გაიმართება.

თვითმმართველობის არჩევნებს 100 ადგილობრივი და 52 საერთაშორისო ორგანიზაცია აკვირდებოდა.

არჩევნები კოვიდრეგულაციების გათვალისწინებით ჩატარდა. დღეს თვითმმართველობის არჩევნებზე პირველად, საპილოტე რეჟიმში ამოქმედდა ხმების ელექტრონული დათვლის მეთოდი. შეიქმნა „საარჩევნო პორტალი 2021“, რაც არჩევნების დღესთან დაკავშირებით, მოქალაქეების ინფორმირებას უზრუნველყოფს.