გიორგი ვოლსკი: სააკაშვილის მიზანი იყო, საერთაშორისო თანამეგობრობის ყურადღება მიექცია თითქოსდა პოლიტიკური დევნისთვის, როცა ეს თემა ვერ განვითარდა, რევოლუციური პროცესების გეგმაზე გადავიდნენ

პარლამენტის თავმჯდომარის პირველი მოადგილე გიორგი ვოლსკი აცხადებს, რომ მიხეილ სააკაშვილის წინააღმდეგ არსებულ საქმეებს პოლიტიკასთან კავშირი არ აქვს და მას შემდეგ, რაც სააკაშვილმა ამ მიმართულებით საერთაშორისო თანამეგობრობის ყურადღება ვერ მიიქცია, ის გადავიდა სხვა გეგმაზე, რომელიც რევოლუციური პროცესების განვითარებას გულისხმობდა.

„მიხეილ სააკაშვილისა და მისი გუნდის მთავარი მიზანი იყო, საერთაშორისო თანამეგობრობის ყურადღება მიექციათ მისი დანაშაულებისთვის, როგორც თითქოს, პოლიტიკური დევნისთვის, თუმცა რეალურად ეს საქმეები პოლიტიკასთან არანაირ კავშირში არ არის. როცა ეს თემა ვერ განვითარდა, მეორე გეგმაზე გადავიდნენ, რომელიც რევოლუციური პროცესების განვითარებას გულისხმობდა. მათი მიზანია, არჩევნებს არანაირი წინაპირობა არ ჰქონდეს, ხალხი შეიკრიბოს, დაიძრას და საპატიმროდან სააკაშვილი დაიხსნას. ეს არის იდეა, ვინაიდან არჩევნების თემას „ნაცმოძრაობა“ არასდროს იზიარებდა და ახლაც არ იზიარებს“, – აღნიშნა ვოლსკიმ.

„ნაციონალური მოძრაობა“ მიხეილ სააკაშვილის მხარდამჭერი აქციის ჩატარებას 14 ოქტომბერს გეგმავს.