გივი მიქანაძე ოპოზიციას: თამარ ჟვანიას პროფესიონალიზმისა და კეთილსინდისიერების შესახებ ყველაფერი იცით, ისევე როგორც იცოდით და იცით, რომ 2020 წლის საპარლამენტო არჩევნები არ გაყალბებულა

მსურს, მივულოცო ქალბატონ თამარ ჟვანიას მაღალი აღიარება საერთაშორისო დონეზე, - საპარლამენტო უმრავლესობის წევრი გივი მიქანაძე პლენარულ სესიაზე თამარ ჟვანიას უზბეკეთში საარჩევნო სისტემების საერთაშორისო ფონდის დირექტორად დანიშვნას გამოეხმაურა.

„მოგეხსენებათ, რომ საარჩევნო სისტემების საერთაშორისო ფონდი, ყველაზე დიდი ამერიკული ორგანიზაციაა, რომელიც ამერიკის მთავრობის დაფინანსებით, მსოფლიოს 100-ზე მეტ ქვეყანაში მუშაობს და მათ შორის საქართველოშიც აქვს წარმომადგენლობა. რაზე მეტყველებს ამერიკის მთავრობის მიერ დაფინანსებული არჩევნებზე მომუშავე ასეთი ავტორიტეტული ორგანიზაციის წარმომადგენლობის ხელმძღვანელად თამარ ჟვანიას დანიშვნა, უპირველესად მისი კომპეტენციისა და პროფესიონალიზმის აღიარებაზე“, - განაცხადა მიქანაძემ.

საპარლამენტო უმრავლესობის წევრმა, ამ საკითხის შეფასებისას ოპოზიციასაც მიმართა: „როგორ ფიქრობთ, ძვირფასი ოპოზიციის წარმომადგენლებო, დანიშნავდა ეს ორგანიზაცია თავის წარმომადგენლად ადამიანს რომელიც არჩევნებს გააყალბებდა? პასუხი ცხადია. თუმცა, თამარ ჟვანიას პროფესიონალიზმისა და კეთილსინდისიერების შესახებ თქვენ ისედაც ყველაფერი იცით. ისევე როგორც იცოდით და იცით იმის თაობაზე, რომ 2020 წლის საპარლამენტო არჩევნები არ გაყალბებულა. თამარ ჟვანიას ხელმძღვანელობით 2020 წელს კოვიდპანდემიის ძალიან რთულ პერიოდში, საარჩევნო ადმინისტრაციამ უმაღლეს დონეზე გაუწია ორგანიზება და ჩაატარა საპარლამენტო არჩევნები, რაც ყველა საერთაშორისო სადამკვირვებლო ორგანიზაციის მიერ იყო აღიარებული თავის ანგარიშებში. საპარლამენტო არჩევნების სამართლიან და კონკურენტულ გარემოში ჩატარება დამტკიცდა პარლამენტში საგამოძიებო კომისიის საქმიანობის შედეგად. იმ საგამოძიებო კომისიის მიერ, რომელში მონაწილეობაზეც თქვენ უარი განაცხადეთ, მხოლოდ და მხოლოდ იმიტომ, რომ იცოდით, ბუნებაში არ არსებობს არანაირი ფაქტი არჩევნების გაყალბებაზე. თქვენი სიცრუით გაჟღენთილი 6-თვიანი კამპანია, საზოგადოებისა და დასავლელი პარტნიორების წინაშე სააშკარაოზე იქნებოდა გამოტანილი.

რა ვქნათ, რომ არც შარშანდელი არჩევნების შედეგები და არც წლევანდელი არჩევნების შედეგები თქვენს მოლოდინებს არ პასუხობს. უბრალოდ გაითავისეთ, რომ საზოგადოება დაიღალა თქვენგან, თქვენი დესტრუქციისა და სიცრუეზე აგებული კამპანიებისა და დაპირებებისგან.

საინტერესოა, რა კომენტარები გაქვთ თქვენ მიერ მთავარ გამყალბებლად შერაცხული თამარ ჟვანიასადმი ასეთი მაღალი ავტორიტეტის მქონე ამერიკული ორგანიზაციის მხრიდან გამოთქმულ ნდობაზე? მე, თქვენ ნაცვლად შემრცხვებოდა და ახლა მაინც მოვუხდიდი ბოდიშს. მაგრამ ბოდიშის მოხდასაც უნარი უნდა, რომელიც თქვენ არ გაგაჩნიათ.

წარმატებები მინდა ვუსურვო ქალბატონ თამარს, ხოლო ოპოზიციას გითხრათ, რომ 30 ოქტომბერს ქართველი ამომრჩეველი კიდევ ერთხელ მხარს დაუჭერს ამ ქვეყნის მშვიდობიან განვითარებას და კიდევ ერთხელ ხაზს გაუსვამს, რომ დესტრუქციული ოპოზიციის ადგილი ხელისუფლებაში არ არის“, - განაცხადა გივი მიქანაძემ.