ირაკლი კობახიძე: ეს არჩევნები უნდა ჩატარდეს სუფთად, სამართლიანად და ასეთ არჩევნებში ჩვენ მეორე ტური უნდა მოვიგოთ

ეს არჩევნები უნდა ჩატარდეს სუფთად, სამართლიანად და ასეთ არჩევნებში ჩვენ მეორე ტური უნდა მოვიგოთ, - ამის შესახებ პარტია „ქართული ოცნების“ თავმჯდომარემ ირაკლი კობახიძემ ჟურნალისტებს გურიაში განუცხადა.

მისი თქმით, ოზურგეთში ისინი შეხვდნენ პარტიის წევრებს, აქტივსა და მხარდამჭერებს და საუბრის მთავარ თემას არჩევნები წარმოადგენდა. კობახიძემ აღნიშნა, რომ მათ მხარდამჭერებს ოზურგეთში პირველ ტურში გამარჯვება მიულოცეს და მეორე ტურთან დაკავშირებული საკითხები განიხილეს. კობახიძემ ასევე კომენტარი გააკეთა 28 ოქტომბერს გასამართ აქციაზეც.

„მნიშვნელოვანია 20-ვე მუნიციპალიტეტში, მათ შორის ოზურგეთში, არჩევნების მოგება. ეს არჩევნები უნდა ჩატარდეს სუფთად, სამართლიანად და ასეთ არჩევნებში ჩვენ მეორე ტური უნდა მოვიგოთ. ეს არის პრინციპულად მნიშვნელოვანი. ყველა საკითხი განვიხილეთ. მათ შორის, თუ რაიმე აქცია დაიგეგმება, ამაზეც გვქონდა მსჯელობა და თუკი გაიმართება, ამასთან დაკავშირებითაც გვექნება სრული მობილიზაცია.

პირველ რიგში, ეს იქნება გამარჯვების აქცია, თუკი ასეთი დაიგეგმა - 2 ოქტომბრის არჩევნებში დამაჯერებელი გამარჯვება ჩვენ უნდა აღვნიშნოთ და ეს იქნება სამობილიზაციო აქცია 30 ოქტომბრის მეორე ტურებისთვის. ეს იქნება საარჩევნო ღონისძიება, თუ ასეთი დაიგეგმება“, - განაცხადა კობახიძემ.

მისივე თქმით, ამ საკითხზე ისინი საბოლოოდ ჩამოყალიბდებიან და ამის შემდეგ ექნებათ კოორდინაცია საარჩევნო შტაბებთან.