თეა წულუკიანი: სამეგრელოსა და ზუგდიდში დაინახეს, რომ იმსახურებენ სხვა რამეს, ვიდრე იმ ბნელეთის დაბრუნებას, რომელიც 2012 წელს გავისტუმრეთ

ვიცე-პრემიერ თეა წულუკიანის განცხადებით, ზუგდიდში ვითარება შეცვლილია და თვითმმართველობის არჩევნების მეორე ტურში „ნაცმოძრაობის“ მერობის კანდიდატი ვერ გაიმარჯვებს.

„უბრალოდ შეუძლებელია და გამორიცხულია, რომ ის ბნელი ძალა, რომელიც სამეგრელოში, მეგრელების ღირსებასა და საქართველოს ყველა რეგიონში ჩვენი ქვეყნის შვილების ღირსებას ფეხქვეშ თელავდა, სამეგრელოში დაბრუნდეს“, - ამის შესახებ თეა წულუკიანმა ტელეკომპანია „იმედის“ ეთერში განაცხადა.

მისი თქმით, უკვე ნათლად ჩანს, რომ სამეგრელომ და ზუგდიდმა შეამჩნია და დაინახა, რომ ფარსია კვლევები, რომლითაც „ნაცმოძრაობა“ ატყუებს საზოგადოებას, რომ უფრო მეტი ხმა აქვთ, ვიდრე „ქართულ ოცნებას“. „დღეს ეს მათივე შეცდომით საჯაროდ გამჟღავნდა და ეს ძალიან კარგად დაინახეს ზუგდიდშიც, დღეს გახლდით ამის მოწმე. შესაბამისად, ყველა ნიშანი არსებობს იმისა, რომ ზუგდიდის მერი იქნება არა მელია, არამედ წოწერია. ეს იქნება ის მერი, რომელთან ერთადაც ჩვენ ვგეგმავთ განვახორციელოთ ის პროექტები, რომელიც სჭირდება სამეგრელოს და რაც ეკადრება პირველ რიგში ზუგდიდს“, - აღნიშნა წულუკიანმა.

მისივე თქმით, „ნაცმოძრაობის“ მმართველობისას სამეგრელოსა და ზუგდიდისთვის პრაქტიკულად არაფერი გაკეთდა. „ჩვენ დადიანების სასახლის არაერთი დარბაზი აღვადგინეთ, როდესაც „ქართუ“ ფონდმა და ბიძინა ივანიშვილმა ნიკო დადიანის სასახლე გადაარჩინა, ამის გაკეთება წინა ხელისუფლებასაც შეეძლო. მაგრამ აქედან ჩანს, თუ როგორ სცემდნენ პატივს სამეგრელოსა და მეგრელებს. ჩენ ახლა ეკატერინეს სასახლის გადარჩენასა და რეაბილიტაციას ვიწყებთ, სადაც დაცულია ღვთისმშობლის კვართი, ამით ყველაფერია ნათქვამი. აქაა ყველაზე დიდი საგანძური და აქაა ყველაფერი ის, რაც აკავშირებს ქართულ კულტურას ევროპულ კულტურასთან. ამიტომაც ამას სჭირდება მოვლა-პატრონობა და ამას ჩვენ გავაკეთებთ. ჩვენი მთავრობა, ეს ხელისუფლება სწორედ „ქართული ოცნების“ კანდიდატთან ერთად, რომელიც ხვალ ნამდვილად გაიმარჯვებს“, - განაცხადა წულუკიანმა.

ამასთან, აღნიშნა, რომ ზუგდიდში მდგომარეობა შეცვლილია. „მათ დაინახეს, რომ არავითარ შემთხვევაში სამეგრელოს და ზუგდიდს „ნაციონალების“ კანდიდატი არ ეკადრება, ისევე, როგორც გუშინწინ ვნახე იგივე რუსთავში, ერთი კვირის წინ იგივე ვნახე ქუთაისში, მათ იციან, რომ ისინი იმსახურებენ სხვა რამეს, ვიდრე იმ ბნელეთის დაბრუნებას, რომელიც გავისტუმრეთ 2012 წელს“, - აღნიშნა წულუკიანმა.

ზუგდიდის 67-საარჩევნო ოლქში დაახლოებით 120 ათასი ამომრჩეველია რეგისტრირებული. ზუგდიდის მერობის „ნაცმოძრაობის“ კანდიდატია ანზორ მელია, ხოლო „ქართული ოცნების“ მამუკა წოწერია.

თვითმმართველობის არჩევნების მეორე ტური 30 ოქტომბერს 5 თვითმმართველ ქალაქში, 15 მუნიციპალიტეტსა და 24 საარჩევნო ოლქში გაიმართება.