ოპოზიციამ 7 ნოემბერს აქცია ჯერ დააანონსა, შემდეგ კი გადაიფიქრა

ოპოზიციამ 7 ნოემბერს აქცია ჯერ დააანონსა, შემდეგ კი გადაიფიქრა. „ნაციონალური მოძრაობის“ თავმჯდომარე ნიკა მელიამ რუსთაველის გამზირზე დღეს გამართულ აქციაზე განაცხადა, რომ ოპოზიცია კვირას, 7 ნოემბერს საპროტესტო აქციას გამართავს. მისი თქმით, დემონსტრაცია რუსთაველის გამზირზე კვირა დღეს ჩატარდება და იქნება ისეთი მასშტაბური, როგორც არასდროს და ბევრი თვალსაზრისით განსხვავებული ყველა წინა დემონსტრაციებისა და შეკრებებისგან.

„ნება მომეცით, ამაზე მეტად დეტალებში ახლა არ შევიდეთ. რა თქმა უნდა, მასშტაბი იქნება იმაზე დიდი, ვიდრე ჩვენ ბოლოს 14 ოქტომბერს ვნახეთ, თუმცა შინაარსი და დატვირთვა იქნება განსხვავებული, ისეთი, როგორიც ამ სახელმწიფოს ინტერესებს ემსახურება“, - თქვა ნიკა მელიამ.

7 ნოემბრის აქცია „ფეისბუქის“ პირად გვერდზე დააანონსა ექსპრეზიდენტმა და ამჟამად პატიმარმა მიხეილ სააკაშვილმაც, თუმცა მისი პოსტი ახლა აღარ იძებნება.

7 ნოემბრის აქციის ანონსს მალევე გამოეხმაურა ოპოზიციონერი, მოძრაობა „დროას“ ლიდერი ელენე ხოშტარია, რომელმაც განაცხადა, რომ „7 ნოემბერს აქცია არ იქნება, რადგან 7-ში არ უნდა იყოს“. როგორც მან „ტვ პირველის“ ეთერში განმარტა, აქცია ჩატარდება, თუმცა აქციის გამართვის ზუსტი დრო არ დაუსახელებია.

„7 ნოემბერს არ იქნება, მოდი პირდაპირ გავხსნი კარტებს. ნიკამ კვირა თქვა, თუმცა მე ახლა ნიკას მაგივრად ვერ ვიტყვი. აქციის გამართვა გადაწყვეტილია, აქცია იქნება 6-ში ან 8 ნოემბერს. სხვა ციკლში არ გადაიწევს, უბრალოდ, 7 ნოემბერს არ იქნება, რადგან 7-ში არ უნდა იყოს“, – განაცხადა ელენე ხოშტარიამ.

ელენე ხოშტარიას კომენტარი გაავრცელა „ტაბულამაც“, სადაც ხოშტარია ამბობს: „აქცია 7 ნოემბერს არ იქნება, შეგვეშალა“.

7 ნოემბერს ოპოზიციის აქციის ანონსს გადაცემა „იმედის კვირაში“ გამოეხმაურა ტელეკომპანია „იმედის“ საინფორმაციო სამსახურის უფროსი, ირაკლი ჩიხლაძეც. „გადაცემის პირველ ნაწილში ჩვენ ვისაუბრეთ 7 ნოემბერზე და „ნაციონალურ მოძრაობას“ შევახსენეთ, რა ხდებოდა 14 წლის წინ მათი ავტორობით რუსთაველზე. გასაკვირი იყო, როდესაც მათ თქვეს, რომ სწორედ აქ გამართავდნენ აქციას, სადაც ადამიანებს უმოწყალოდ გაუსწორდნენ, შემდეგ იქედან წამოსული სპეცრაზმი ტელეკომპანია „იმედში“ შემოიჭრა... ბოლო ერთ საათში პროცესები უცნაურად განვითარდა“, - აღნიშნა ირაკლი ჩიხლაძემ.