ნანა კაკაბაძე: პატიმრის სამოქალაქო საავადმყოფოში გადაყვანა უნდა იყოს გამოწვეული სამედიცინო მოთხოვნებით, და არა პოლიტიკური დაკვეთით

ორგანიზაციის „ყოფილი პოლიტპატიმრები ადამიანის უფლებებისთვის“ თავმჯდომარე სტრასბურგის სასამართლოს გადაწყვეტილებას გამოეხმაურა. ნანა კაკაბაძის განცხადებით, სასამართლომ ცალსახად თქვა, რომ პატიმარ მიხელ სააკაშვილის განთავსების ადგილი არის ის დაწესებულება, რომელშიც ახლა იმყოფება.

„სტრასბურგის სასამართლოს გადაწყვეტილებაში ცალსახად წერია, რომ სააკაშვილის განთავსების ადგილი არის ის, რაც სახელმწიფომ გადაწყვიტა და რასაც კანონმდებლობა ითვალისწინებს. რაც შეეხება მის ქალაქის საავადმყოფოში გადაყვანას, ესეც კანონქვემდებარე მოვლენაა და ხდება იმ შემთხვევაში, როდესაც დასაბუთებულად არსებობს იმის ვარაუდი, რომ რაიმე სამედიცინო ღონისძიების ჩატარება, რომელიც პატიმარს ესაჭიროება, ამ კონკრეტულ დაწესებულებაში შეუძლებელია. მაშინ ის გადაჰყავთ პროფილურ საავადმყოფოში. ეს უნდა იყოს გამოწვეული სამედიცინო მოთხოვნებით, და არა პოლიტიკური დაკვეთით“, - განაცხადა კაკაბაძემ.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. პატიმრობაში მყოფმა სააკაშვილმა შიმშილობა გამოაცხადა. სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვენ, იუსტიციის სამინისტრო კი აცხადებს, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.

6 ნოემბერს პენიტენციურმა სამსახურმა გაასაჯაროვა იმ პროდუქტების ამსახველი ფოტომასალა, რომლებითაც პატიმარი სააკაშვილი იკვებებოდა.

მიხეილ სააკაშვილი გლდანის მე-18 სამკურნალო დაწესებულებაში 8 ნოემბერს გადაიყვანეს.

სტრასბურგის სასამართლომ არ დააკმაყოფილა სააკაშვილის საჩივარი კერძო კლინიკაში გადაყვანასთან დაკავშირებით და შიმშილობის შეწყვეტა მოსთხოვა.

დღეს კი პენიტენციურმა სამსახურმა №18 დაწესებულებაში პატიმარ მიხეილ სააკაშვილის შესახლების, პალატაში განთავსების კადრები გაასაჯაროვა.