გიორგი ხელაშვილი: დასავლეთის წყაროებიდან რაიმე განცხადება, კრიტიკა - დაადანაშაულონ „ქართული ოცნება“ პრორუსულობაში, ავტორიტარიზმში, ჩვენ პრაქტიკულად არ მოგვისმენია

ბოლო წელიწადნახევრის განმავლობაში ჩვენ დასავლეთის წყაროებიდან პრაქტიკულად არ მოგვისმენია, რომ დაადანაშაულონ „ქართული ოცნება“ პრორუსულობაში ან ავტორიტარიზმში. პირიქით, მუდმივადაა საუბარი ამ ურთიერთობების გაღრმავებაზე, - ამის შესახებ გადაცემაში „იმედი LIVE“ პარლამენტის საგარეო ურთიერთობათა კომიტეტის თავმჯდომარის მოადგილემ, გიორგი ხელაშვილმა განაცხადა.

მან ოპოზიციის დესტრუქციულ ქმედებებზე ისაუბრა.

„ისინი ძალიან კარგად ხედავენ, რომ მათი ისტერიული ქმედებები მთავრობის, საკუთარი სახელმწიფოს წინააღმდეგ, გულის სიღრმეში ბევრი ხვდება, რეალურად, მართლაც რუსეთის წისქვილზე ასხამს წყალს. მე ვსაუბრობ, შედარებით შეგნებულ ნაწილზე. ისინი, დარწმუნებული ვარ, ამას ძალიან განიცდიან, მაგრამ უკვე სხვაგან დგომა, სხვაგვარად ქცევა აღარ შეუძლიათ. აყოლილი არიან „ნაციონალური მოძრაობის“ სრულიად რადიკალურ ფრაქციას“, - განაცხადა ხელაშვილმა.

მან ასევე ქართული პოლიტიკის მიმართ უცხოეთის დამოკიდებულებაზეც ისაუბრა.

„უცხოეთის დამოკიდებულება ქართული პოლიტიკის მიმართ არის ადეკვატური. ეს ნიშნავს, რომ „ნაციონალური მოძრაობა“ იქნება თუ სხვა პარტიები, მათ წარმოდგენაში თითოეული მათი არგუმენტი, ბრალდება, მათ შორის „პრორუსულობაზე“ და ასე შემდეგ, ეს არის მათთვის უნივერსალური წამალი დასავლეთის ყურადღების მისაპყრობად. ასევე, მათ სჯერათ, რომ თუკი სადმე პოლიციასთან დაპირისპირების კადრები გავრცელდება, ეს წამსვე გადაითარგმნება, რომ საქართველო არის ბელორუსი და ასე შემდეგ.

სინამდვილეში დასავლეთი ყოველთვის უყურებს ამ დიდ სურათს, რომელიც საქართველოშია და ყოველნაირი მცდელობა, ფანდი ქართული ოპოზიციის, რათა წარმოადგინოს, რომ საქართველოში არის არეულობა, ავტორიტარიზმისკენ მისწრაფება და ასე შემდეგ, ეს ძალიან ადვილად იშიფრება. სწორედ ამითია განპირობებული, რომ მთელი ბოლო წელიწადნახევრის განმავლობაში, რომ დაადანაშაულონ „ქართული ოცნება“ პრორუსულობაში, ავტორიტარიზმსა და ასე შემდეგ, პრაქტიკულად ჩვენ დასავლეთის წყაროებიდან რაიმე მსგავსი განცხადება, კრიტიკა არ მოგვისმენია, პირიქით, მუდმივადაა საუბარი ამ ურთიერთობების გაღრმავებაზე“, - განაცხადა ხელაშვილმა.