არჩილ თალაკვაძე თაკო ჩარკვიანს: რომელი მაღალტექნოლოგიური სამედიცინო ჩარევა სჭირდება მიხეილ სააკაშვილს ისეთი, რომ ერთი მულტიპროფილური კლინიკიდან მის სხვა კლინიკაში გადაყვანას ითხოვთ?

„მინდა, კიდევ ერთხელ, ძალიან მშვიდად ვკითხო ქალბატონ თაკო ჩარკვიანს: რა მაღალტექნოლოგიური სამედიცინო ჩარევა სჭირდება მიხეილ სააკაშვილს ისეთი, რომ ერთი მულტიპროფილური კლინიკიდან მის სხვა კლინიკაში გადაყვანას ითხოვთ?“, - ამ კითხვით მიმართა საპარლამენტო უმრავლესობის წევრმა, არჩილ თალაკვაძემ თაკო ჩარკვიანს.

იქამდე, პარტია „კანონი და სამართლის“ ლიდერი, რომელიც პარლამენტის საშემოდგომო სესიის პლენარული სხდომას არ ესწრებოდა, დარბაზში შევიდა და თქვა, რომ მიხეილ სააკაშვილი კერძო სამედიცინო დაწესებულებაშია გადასაყვანი.

„მიხეილ სააკაშვილი, ამჟამად, ზუსტად C კატეგორიის, მულტიპროფილურ კლინიკაში იმყოფება. პროვოკაციისა და ფონის დამშვიდება თუ გსურთ, ალბათ, პირველ რიგში, სჯობს, რომ მოუწოდოთ მასაც და თქვენს სხვა კოლეგებსაც, რომ შეწყვიტონ შიმშილობა, აღიარონ საპარლამენტო და თვითმმართველობის არჩევნებში მარცხი, ჩაერთონ პოლიტიკურ ცხოვრებაში, მობრძანდნენ დარბაზში და იმსჯელონ კანონპროექტებში და იმ პრობლემებზე, რომლებიც დღეს საზოგადოებას აწუხებს. ეს იქნებოდა ჩემი კოლეგიალური რჩევა“, - აღნიშნა არჩილ თალაკვაძემ.

პარლამენტის თავმჯდომარემ, კახა კუჭავამ, თაკო ჩარკვიანს შეახსენა, რომ პარლამენტი, ამჟამად კანონპროექტებს განიხილავს და პოლიტიკური განცხადებებისთვის განკუთვნილი დრო დასრულებულია.

დღეს, მთავრობის ადმინისტრაციაში გამართულ ბრიფინგზე, ჯანდაცვის მინისტრის მოადგილემ, თამარ გაბუნიამ კიდევ ერთხელ განმარტა, რომ გლდანის საავადმყოფო არის C ტიპის მრავალპროფილური კლინიკა და ეს აღწერილია რეგულირების სააგენტოს დასკვნაში, რაც ნიშნავს იმას, რომ დაწესებულებაში არის საკმარისი პირობა, ყველა სტანდარტული გაიდლაინის მიხედვით, შიმშილობისა და შიმშილობიდან გამოსვლის შემთხვევაში, მდგომარეობის მართვისთვის.