დავით ზალკალიანი: ევროკავშირის სამ პრეზიდენტს ხვდებიან პრემიერ-მინისტრები, რაც კიდევ ერთხელ მიანიშნებს, რაოდენ მაღალია მოლოდინი აღმოსავლეთ პარტნიორობის სამიტთან მიმართებაში

პრემიერ-მინისტრები სამ პრეზიდენტს ხვდებიან​ - ევროკავშირის, ევროკომისიისა და ევროპარლამენტის, ეს კიდევ ერთხელ მიანიშნებს ამ ვიზიტის დიდ მნიშვნელობაზე და ასევე იმაზე, რაოდენ მაღალი მოლოდინები არის აღმოსავლეთ პარტნიორობის სამიტთან მიმართებაში, - ამის შესახებ დავით ზალკალიანმა განაცხადა. საგარეო საქმეთა მინისტრის თქმით, ასოცირებული ტრიოს პრემიერ-მინისტრების ვიზიტი ბრიუსელში ძალიან მნიშვნელოვანია.

„ეს შეხვედრები ასოცირებული სამეულის ფორმატში მაქსიმალურად გამოვიყენეთ იმისთვის, რომ აღმოსავლეთ პარტნიორობის სამიტთან დაკავშირებით ჩვენი მოლოდინების შესახებ გვესაუბრა. რა თქმა უნდა, ეს არის პირველ რიგში ის, რომ ჩვენი ევროპული არჩევანი და ევროპული მისწრაფება შესაბამისად იყოს ასახული. ასევე, ის, რომ მხარდაჭერილი იყოს მთავარი ფუნდამენტური პრინციპი სუვერენიტეტის და ტერიტორიული მთლიანობის. განსაკუთრებული აქცენტი გაკეთდა დაკავშირებადობაზე, ეს არის ჩვენი ერთ-ერთი პრიორიტეტი ევროკავშირთან უახლოესი პერსპექტივის ურთიერთობების და ის ხუთი საფლაგმანო პროექტი, რომელიც წარმოდგენილია ევროკავშირის მხრიდან, თუ როგორ შეიძლება მისი პრაქტიკულ განზომილებაში გადაყვანა და კონკრეტული შედეგების მიღწევა.

ასევე, მნიშვნელოვანი აქცენტები გაკეთდა ერთიან ევროპულ ბაზარზე წვდომის კუთხით, რაც ჩვენი ერთ-ერთი მთავარი პრიორიტეტია და ეს საერთო პრიორიტეტია არამარტო საქართველოსთვის, არამედ უკრაინას და მოლდოვისთვის. აღმოსავლეთ პარტნიორობის სამიტის მოლოდინების გარდა საუბარი იყო ბევრ სხვა თემაზე, განსაკუთრებით რეგიონში უსაფრთხოებასთან დაკავშირებით და ძალიან პოზიტიურად აღინიშნა ის როლი, რომელსაც საქართველო ასრულებს. კერძოდ საქართველოს პრემიერ-მინისტრის ინიციატივით გამართული მედიაციის პროცესი აზერბაიჯანსა და სომხეთს შორის და ასევე ჩვენი ინიციატივები, რომელიც სამშვიდობო-სამეზობლო ინიციატივის სახელით არის ცნობილი და პრემიერის ინიციატივა გახდა და ევროკავშირის მხრიდან ამ ინიციატივას აქვს ძალიან ძლიერი, სერიოზული მხარდაჭერა და მნიშვნელოვანია, რომ მათი ჩართულობაც იყოს უზრუნველყოფილი და ამ თემებზე გვქონდა ჩვენ ძალიან კარგი საუბარი“, - განაცხადა ზალკალიანმა.

ასოცირებული ტრიოს პრემიერ-მინისტრები ევროკავშირში უმაღლესი დონის შეხვედრებს მართავენ.