კახა კალაძე: თბილისი არ არის ქალაქი, რომელშიც უბრალოდ ცხოვრობ და მუშაობ - თბილისი არის ქალაქი თავისი მყარი სოციალური არქიტექტურით, ისტორიითა და განუმეორებელი კოლორიტით

თბილისის მერმა, კახა კალაძემ დედაქალაქის საკრებულოს დასამტკიცებლად, მუნიციპალიტეტის მთავრობის ახალი შემადგენლობა წარუდგინა. საკრებულოს სხდომაზე მერის მოადგილეების, სამსახურის ხელმძღვანელებისა და გამგებლების დამტკიცების შესახებ მსჯელობენ.

კახა კალაძემ საკრებულოს წევრებს სიტყვით მიმართა და საზოგადოებას არჩევნებში მხარდაჭერისთვის მადლობა კიდევ ერთხელ გადაუხადა.

„დღეს აქ, თბილისის საკრებულოს შენობაში ვიმყოფებით ადამიანები, ვისაც თბილისელებმა მომდევნო ოთხი წლის განმავლობაში, ჩვენი ქალაქის მართვა გვანდეს. ვისარგებლებ შემთხვევით და კიდევ ერთხელ გადავუხდი ამისთვის მადლობას თითოეულ თბილისელს, ჩვენი გუნდის მიმართ გამოხატული ნდობისთვის, იმისთვის, რომ მოგვცეს შესაძლებლობა, ვიზრუნოთ თბილისზე და ერთად შევქმნათ ჩვენი ქალაქის უკეთესი მომავალი. მადლობა მინდა ასევე, გადავუხადო კონკრეტულად იმ ადამიანებს, ვინც ჩართული იყო ჩვენს საარჩევნო კამპანიაში და ყველაფერს აკეთებდა იმისთვის, რომ გამარჯვებისთვის მიგვეღწია“, - განაცხადა თბილისის მერმა.

მისივე თქმით, მმართველი ძალისა თუ ოპოზიციის ყველა წარმომადგენელი ვალდებულია, თბილისის საკეთილდღეოდ მაქსიმალურად დაიხარჯოს.

„მადლობა ეკუთვნით იმ ადამიანებსაც, ვინც საკუთარი ქალაქის წინაშე პირნათლად მოიხადა მოქალაქეობრივი ვალი, მივიდა არჩევნებზე და დააფიქსირა საკუთარი პოზიცია, თუნდაც არა ჩვენი, არამედ ჩვენი ოპონენტების სასარგებლოდ, რადგან ჩვენ ვცხოვრობთ დემოკრატიულ სახელმწიფოში და საგნობრივი ოპონირება, პოლიტიკური პლურალიზმი მხოლოდ გვაძლიერებს და გვაძლევს სტიმულს კიდევ უფრო მეტი გავაკეთოთ ჩვენი ქალაქისა და ამ ქალაქში მცხოვრები ადამიანებისთვის. მითუმეტეს, არ უნდა დაგვავიწყდეს, რომ ვსაუბრობთ თბილისის, ერთ-ერთ ყველაზე მრავალფეროვანი და მულტიკულტურული ქალაქის საკრებულოზე და თითოეული ჩვენგანი, მმართველი ძალის, თუ ოპოზიციის წარმომადგენელი, განურჩევლად საკუთარი პოლიტიკური შეხედულებებისა, უბრალოდ ვალდებული ვართ, ყველაფერი გავაკეთოთ და მაქსიმალურად დავიხარჯოთ თბილისის საკეთილდღეოდ“, - აღნიშნა კახა კალაძემ.

თბილისის მერის განცხადებით, თბილისი არ არის ქალაქი, რომელშიც უბრალოდ ცხოვრობ და მუშაობ - თბილისი არის ქალაქი თავისი მყარი სოციალური არქიტექტურით, ისტორიითა და განუმეორებელი კოლორიტით.

„ჩემგან არავის გესწავლებათ და ყველამ ვიცით, რომ თბილისი არ არის ქალაქი, რომელშიც უბრალოდ ცხოვრობ, მუშაობ და მდორედ მიუყვები ცხოვრებას. თბილისი არის ქალაქი თავისი მყარი სოციალური არქიტექტურით, ისტორიითა და განუმეორებელი კოლორიტით. ალბათ ყველა „ახალგაზრდა“ ქალაქი რაღაცით ერთმანეთს ჰგავს, ყველა ძველი ქალაქი კი თავისებურად გამორჩეულია, თუმცა, თბილისს არამხოლოდ ყოველი ფეხის ნაბიჯზე ჩაბუდებული ისტორია და გასაოცარი კულტურული თუ არქიტექტურული მემკვიდრეობა, არამედ სწორედ მთელი ქალაქის მასშტაბით, სხვადასხვა უბანში გაფანტული ადამიანები ქმნიან. სწორედ ეს ადამიანები სძენენ ამ საოცარ ქალაქს სიცოცხლეს და ჩვენ, ჩვენი მხრივ, ვალდებული ვართ, მათი საცხოვრებელი გარემო გავხადოთ სოციალურად უფრო მეტად უზრუნველყოფილი, უფრო ჯანსაღი, უფრო კომფორტული და რა თქმა უნდა, სიცოცხლით სავსე“, - განაცხადა კახა კალაძემ.

თბილისის მერმა იმედი გამოთქვა, რომ კონკურენციის მიუხედავად, პოლიტიკური ოპონენტებიც ეცდებიან, რომ ქალაქის მასშტაბით შექმნილი ყველა სიკეთის თითოეულ მოქალაქემდე მიტანის საკითხში საკუთარ წვლილს შეიტანენ.

„მეტი სიცოცხლე ყველა უბანში“ არაა უბრალო სიტყვები. ეს არის კონკრეტული ხედვა, თუ როგორ მიგვაჩნია ამ ქალაქის განვითარება, როგორ წარმოგვიდგენია ჩვენი დედაქალაქი ოთხი წლის შემდეგ. მწამს, რომ დღეს, მითუმეტეს, მსოფლიო პანდემიის ფონზე, სწორედ ეს თითოეული უბნის, ამ უბნებში მცხოვრები თითოეული ადამიანის კეთილდღეობა, ქალაქის მასშტაბით შექმნილი ყველა სიკეთის თითოეულ ადამიანამდე მიტანა, უნდა იყოს ჩვენი მიზანიც და მთავარი საზრუნავიც. გულწრფელად მინდა მჯეროდეს, რომ პოლიტიკური კონკურენციის, სამწუხაროდ, ხშირად დაპირისპირების მიუხედავადაც კი, ჩვენი პოლიტიკური ოპონენტებიც ეცდებიან, რომ საკუთარი აგური დადონ ამ საქმეში - ქალაქის განვითარებასა და აღმშენებლობაში. შესაძლოა, ამგვარ ერთიანობას, პასუხისმგებლობიან, პატრიოტულ მიდგომას დღეს უფრო დიდი მნიშვნელობა აქვს, ვიდრე ოდესმე, რადგან არც ჩვენს ქვეყანას, არც ჩვენს ხალხს და არც თბილისს დასაკარგი დრო ნამდვილად აღარ აქვს“, - განაცხადა კახა კალაძემ.

თბილისის მერმა აქვე, საკრებულოს წევრებს დედაქალაქისა და აქ მცხოვრები თითოეული მოქალაქის ინტერესების დასაცავად, გაერთიანებისკენ მოუწოდა.

„დღეს მე, როგორც ქალაქის თბილისის არჩეული მერი, მოგმართავთ თქვენ, თბილისის საკრებულოს დეპუტატებს და გთხოვთ გავერთიანდეთ ჩვენი ქალაქის, აქ მცხოვრები ნებისმიერი წარმომავლობის, აღმსარებლობის თუ პოლიტიკური შეხედულების თითოეული ადამიანის საუკეთესო ინტერესების დასაცავად და იმისთვის, რისთვისაც თბილისელებმა გამოგვიცხადეს ნდობა“, - აღნიშნა კახა კალაძემ.

დედაქალაქის მერმა სიტყვით გამოსვლისას ასევე, როგორც უკვე განხორციელებული, ისე მიმდინარე თუ დაგეგმილი მასშტაბური პროექტები განიხილა.