ირაკლი კობახიძე: დაბალი ბარიერის მთავარი პოტენციური ბენეფიციარი არის „ნაცმოძრაობა“, რომელიც შანსს ელოდება, რომ ე.წ. კოალიციის პირობებში მობრუნდეს ხელისუფლებაში

სინამდვილეში, დაბალი ბარიერის მთავარი პოტენციური ბენეფიციარი არის არა ის პოლიტიკური პარტია, რომელიც 2,5%-ის, ან 3%-ის აღებას ელოდება, არამედ „ნაცმოძრაობა“, რომელიც პრაქტიკულ შანსს ელოდება, რომ რაღაცნაირად, ე.წ. კოალიციის პირობებში მობრუნდეს ხელისუფლებაში, - ამის შესახებ „ქართული ოცნების“ თავმჯდომარემ, ირაკლი კობახიძემ „პირველი არხის“ ეთერში განაცხადა.

„სინამდვილეში, „ნაცმოძრაობა“ ფიქრობს, რომ დაბალი ბარიერის მთავარი ბენეფიციარი თვითონ არის. არა იმიტომ, რომ მას 5%-იანი ბარიერის გადალახვა უჭირს, არამედ იმიტომ, რომ ერთადერთი შანსი, როდესაც „ნაცმოძრაობას“ ხელისუფლებაში მობრუნების საშუალება ეძლევა, არის სწორედ დაბალი ბარიერის პირობებში. რატომ? იმიტომ, რომ მას არასდროს შეეძლება, ხელისუფლებაში მობრუნდეს. გამორიცხულია, ხომ, რომ „ნაცმოძრაობამ“ ჩვენ არჩევნები მოგვიგოს?! ჩვენ მეტი შედეგი გვექნება, 2024-შიც და 2028-შიც. „ნაცმოძრაობა“ ჩვენ ვერ გვაჯობებს. როგორც ბოლო არჩევნებზე იყო - 47% ავიღეთ, „ნაცმოძრაობამ“ კი 31%. ანუ, ვერც გვიახლოვდება და ვერც დაგვიახლოვდება. ეს მათ იციან და შესაბამისად, ერთადერთი თეორიული შანსი, რომ ისინი ხელისუფლებაში მობრუნდნენ, არის შემდეგი - დაბალი იყოს ბარიერი, „ნაცმოძრაობასთან“ ერთად ეს დაბალი ბარიერი გადალახონ მისმა პოტენციურმა სატელიტებმა, როგორიც არის „ლელო“, „საქართველოსთვის“, „ევროპული საქართველო“ და ასე შემდეგ, მერე კი, მათთან ერთად შექმნას კოალიციური ხელისუფლება“, - განაცხადა კობახიძემ.

მან ასევე განმარტა, რომ ბარიერის დაწევასთან დაკავშირებული საკონსტიტუციო ცვლილებები პარლამენტმა შესაძლოა, 2022, 2023, ან 2024 წელს მიიღოს მესამე მოსმენით. კობახიძემ ასევე აღნიშნა, რომ შეიძლება, საქართველოსთვის 5%-იანი ბარიერი ბევრად უკეთესიც იყოს, რადგან ასეთი ბარიერის პირობებში, პოლიტიკურ სისტემაში სტაბილურობის ხარისხი უფრო მაღალია.