ცესკო გირჩის მიერ წარდგენილ ხელმოწერებზე განმარტებას აკეთებს

ცენტრალური საარჩევნო კომისია "გირჩის" მიერ წარდგენილ მხარდამჭერთა ხელმოწერებზე განმარტებას აკეთებს. უწყების პრესსპიკერის განცხადებით, ახალი პოლიტიკური ცენტრის მიერ წარმოდგენილი რეკვიზიტები კანონთან შეუსაბამო იყო, რაც იმას ნიშნავს, რომ 27 990 ხელმოწერიდან, მხოლოდ 13 იყო კანონთან შესაბამისი.

ცესკოს ცნობით, "გირჩს" ცესკოს გადაწყვეტილების გასასაჩივრებლად ვადა დღეს 18:00 საათამდე აქვს.

"გირჩმა" ცესკო-ში, თვითმმართველობის არჩევნებში დარეგისტრირების მოთხოვნით, 28050-ზე მეტი მხარდამჭერის ხელმოწერა 31 ივლისს წარადგინა. ხელმოწერების გადასამოწმებლად ცესკოს 10-დღიანი ვადა ჰქონდა. შაბათს "გირჩის" ფეისბუკ გვერდზე გავრცელდა ხელმოწერების "დამზადების" ვიდეო. 28 ივლისს, პარტიის ლიდერმა ზურაბ ჯაფარიძემ ვიდეომიმართვაში განაცხადა, რომ ისინი საჯაროდ აპირებენ ხელმოწერების გაყალბებას.

8 აგვისტოს "გირჩმა" ხელმოწერებზე ცესკოს პასუხი მიიღო, რასთან დაკავშირებითაც პოლიტიკურმა ცენტრმა განცხადება გაავრცელა. 

"გირჩი"-ს წევრებს გაუჩნდათ ეჭვი, რომ ცესკომ ხელმოწერები არასათანადოდ შეამოწმა, ვინაიდან ამდენი ხელმოწერის შემოწმება ერთ დღეში შეუძლებელია და ამის სტატისტიკასაც ავრცელებს.

"გუშინ თქვენგან მივიღეთ ოფიციალური შეტყობინება, რომელშიც წერია, რომ ცესკომ 7 აგვისტოს გადაამოწმა გირჩის მიერ წარმოდგენილი 27,990 ხელმოწერა და დაადგინა რომ 27,977 არის ბათილი, ხოლო 13 არის ნამდვილი.

ანუ, ნახევარ დღეში ჩაატარეთ საკმაოდ მასშტაბური სამუშაო, ოფიციალური წერილიც მოამზადეთ და გადმოგვიგზავნეთ.

დავუშვათ, ხელმოწერების შემოწმება დაიწყეთ 09.00 საათზე და დაასრულეთ 17.00 საათზე, შემდეგ ნახევარ საათში მოამზადეთ შეტყობინება და 1 საათში ჩაგვაბარეთ (ჩაგვბარდა დაახლოებით 18.30 საათზე).

ანუ, საათში შეამოწმეთ დაახლოებით 3,500 ხელმოწერა, წუთში დაახლოებით 60 ხელმოწერა, წამში 1 ხელმოწერა.

ჩვენ ვფიქრობთ, რომ საოცარი ტემპია თუნდაც 3 შემმოწმებლისთვის (თუ, რა თქმა უნდა, ხელმოწერების ავტოსწრაფშემმოწმებელი არ არის გამოგონებული და ამის შესახებ ჩვენ ინფორმაციას არ ვფლობთ)", - ეწერა განცხადებაში.