კახა კალაძე: პარკირების მენეჯმენტი ადგილობრივმა ხელისუფლებამ უნდა განახორციელოს

"ქართული ოცნების" თბილისის მერობის კანდიდატმა კახა კალაძემ Facebook-ზე გავრცელებულ ახალ ვიდემიმართვაში დედაქალაქში პარკირების პრობლემის შესახებ ილაპარაკა.

კალაძის განცხადებით, თბილისის საცობების ერთ-ერთი მთავარი მიზეზი ქაოტური პარკირება და პარკინგისთვის აუცილებელი შესაბამისი ინფრასტრუქტურის არარსებობაა. მისი თქმით, წლების წინ "სითი პარკთან" არასწორი ვალდებულებებით დატვირთული ხელშეკრულება გაფორმდა, "რამაც თბილისელებს მოუტანა ძალიან ბევრი ჯარიმა და ნაკლები ადგილი პარკირებისთვის".

კალაძემ ოპონენტებიც გააკრიტიკა, რომლებიც თბილისის მერიასა და "სითი პარკს" შორის გაფორმებული ხელშეკრულების გაწყვეტის შესახებ სხვადსხვა ვარიანტებს სთავაზობს წინასაარჩევნოდ მოსახლეობას. კალაძემ მათ განცხადებებს "პოპულიზმისკენ მიმართული ვერსიები" უწოდა.

"პარკინგის მართვა - ეს არ არის მხოლოდ კონკრეტული ადგილების შემოხაზვა, თეთრი საღებავით მონიშვნა და არც თუნდაც ჯარიმების გამოწერა. მგონია, რომ ყველას ძალიან კარგად გვესმის - რაც უფრო ნაკლები მანქანის გასაჩერებელი ადგილი იქნება ქალაქში, მით უფრო მეტ ჯარიმას გამოწერს კერძო კომპანია. პირდაპირ შეიძლება ითქვას, რომ ეს ინტერესთა კონფლიქტია. ჩვენ ვისმენთ შეუსწავლელ, პოპულიზმისკენ მიმართულ ვერსიებს ახალი კომპანიის შემოსვლაზე, ხან ბიუჯეტიდან თანხის გასტუმრებაზე, რაც მგონია, რომ კიდევ უფრო დააწვება თითოეულ თბილისელს ჯიბეზე. რეალურად ეს არის თბილისელების დისკომფორტის გადამისამართება ერთი კომპანიიდან მეორეზე და არა იმ პრობლემის აღმოფხვრა და მოგვარება, რომელიც აწუხებს თბილისსა და თბილისელებს. ამიტომაც მგონია, რომ საჭიროა საკითხის მიმართ სამართლებრივი და კომპლექსური მიდგომა და სწორი გამოსავლის პოვნა. მგონია, რომ სწორი მოდელია, როდესაც პარკირების მენეჯმენტს ადგილობრივი ხელისუფლება ახორციელებს. ასეთ შემთხვევაში გათვალისწინებული იქნება მძღოლებისა და ფეხითმოსიარულეების ინტერესები და სათანადოდ იქნება დაცული მათი უფლებები. თბილისელების მიერ გადახდილი თითოეული თეთრი ვინმეს ჯიბეში კი არ წავა, არამედ პირდაპირ მიმართული იქნება ქალაქის ბიუჯეტში და მთლიანად მოხმარდება პარკირების პროექტების განხორციელებას. ეს ძალიან მნიშვნელოვანია, ეს არის ის, რაც სჭირდება თბილისელებს, ეს იქნება პარკინგის თანამედროვე სისტემა, რომელიც სიცოცხლით სავსე ქალაქის ნაწილია", - განაცხადა კახა კალაძემ.