ლაშა დარსალია: ადამიანის უფლებათა და ჰუმანიტარულ საკითხებს რუსეთი პოლიტიკური ვაჭრობის საგნად, ზეწოლის ინსტრუმენტად იყენებს

ჟენევის საერთაშორისო მოლაპარაკებებთან დაკავშირებით, საგარეო ურთიერთობათა კომიტეტმა მოსმენა გამართა.

„ჟენევის საერთაშორისო მოლაპარაკებები შექმნილია კონკრეტული პროცესის გარშემო. ცეცხლის შეწყვეტის შესახებ ექვსპუნქტიანი შეთანხმება 2008 წლის 12 აგვისტოს გაფორმდა და რუსეთი მაქსიმალურად ცდილობს, თავი აარიდოს ამ შეთანხმების შესრულებას. აქედან მხოლოდ ერთადერთი პუნქტია შესრულებული და ისიც პუნქტი, რომელიც საქართველოს ვალდებულებებს ეხება. დანარჩენ პუნქტებზე, ჩვენ გვაქვს რეალობა, როდესაც რუსეთის ფედერაცია თავს არიდებს აღნიშნული ხელშეკრულების შესრულებას“, - ამის შესახებ საგარეო საქმეთა მინისტრის პირველმა მოადგილემ, ლაშა დარსალიამ საგარეო ურთიერთობათა კომიტეტის სხდომაზე განაცხადა.

მომხსენებელმა, ოკუპირებულ ტერიტორიებზე, ადამიანის უფლებათა და ჰუმანიტარული თვალსაზრისით არსებულ მძიმე ვითარებაზე ისაუბრა და აღნიშნა, რომ რუსეთი ცდილობს, ეს ვითარება ზეწოლის ინსტრუმენტად გამოიყენოს, რაც კიდევ უფრო ართულებს მდგომარეობას.

„შესაბამისად, საქართველოს დელეგაციისთვის, ერთ-ერთი მთავარი ამოცანაა ადამიანის უფლებათა და ჰუმანიტარული საკითხებზე პროგრესის მიღწევა ისე, რომ ეს არ იყოს დაკავშირებული უსაფრთხოების თემატიკასთან. ამ მიმართულებით ჩვენ გვაქვს რამდენიმე მნიშვნელოვანი ამოცანა არა მხოლოდ ჟენევის მოლაპარაკებათა პროცესში, არამედ, მთლიანად, საგარეო პოლიტიკური თვალსაზრისით. ერთ-ერთი მთავარი ამოცანაა ადამიანის უფლებათა საერთაშორისო მექანიზმების უპირობო შეღწევა ოკუპირებულ ტერიტორიაზე“, - განაცხადა მთავრობის წარმომადგენელმა.„იქ არსებული მდგომარეობა კიდევ უფრო დამძიმებულია მიზანმიმართული პოლიტიკის მიერ, რომლის მიზანიცაა, რომ ჰუმანიტარული საკითხები და ადამიანის უფლებათა თემატიკით ვაჭრობა დამატებითი ზეწოლისთვის გამოიყენოს, როგორც უშუალოდ მოლაპარაკებათა პროცესში, ისე - მთლიანად საქართველოს ხელისუფლებაზე, რაც კიდევ უფრო ართულებს კონკრეტული ამოცანების მიღწევას განსაკუთრებით, ექვსპუნქტიანი შეთანხმების შესრულებასთან მიმართებაში. პრაქტიკულად, რეალობა, რომელიც ადგილზე გვაქვს, დაკავშირებული უკანონო ბორდერიზაციებთან, დაკავებებთან, ეთნიკური ნიშნით დისკრიმინაციასთან და ა.შ. არის მიზანმიმართული პოლიტიკის ნაწილი, რათა კიდევ უფრო გაძლიერდეს ზეწოლა საქართველოზე. ადამიანებს, რომლებიც ცხოვრობენ ოკუპირებულ ტერიტორიაზე, პრაქტიკულად, იყენებენ მძევლებად, პოლიტიკური ამოცანების მისაღწევად“, - განაცხადა ლაშა დარსალია.