იურიდიულ საკითხთა კომიტეტის სხდომაზე დაჩქარებული წესით მოთხოვნილი კანონპროექტები განიხილეს

სახელმწიფო ინსპექტორის სამსახურის გაუქმების შემდეგ საგამოძიებო დეპარტამენტი სპეციალური გამოძიების სამსახურში გადავა ავტომატურად. ასევე ის დეპარტამენტები, რომლებიც პირდაპირ არიან მიბმულნი პერსონალური მონაცემების დამუშავების ან მოსმენების საკითხებზე, ისინი პირდაპირ გადავლენ პერსონალური მონაცემთა დაცვის სამსახურში, ხოლო იმ დეპარტამენტების თანამშრომლებს, რომლებიც ბიუროკრატიულ და ადმინისტრაციულ საქმიანობას ეწევიან, არჩევანის უფლება ექნებათ თუ რომელ სამსახურში გააგრძელებენ ტოლფას თანამდებობაზე ტოლფასი სახელფასო სარგოთი მუშაობას. ის საქმის წარმოებები, რომლებიც უკვე დაწყებულია, ავტომატურად გაგრძელდება და არც ერთ პროცესს ხელი არ შეეშლება, - განაცხადა კომიტეტის თავმჯდომარის მოადგილემ, რატი იონათამიშვილმა „სახელმწიფო ინსპექტორის სამსახურის შესახებ“ საქართველოს კანონში ცვლილების შეტანის თაობაზე“ და საკანონმდებლო ცვლილებების პაკეტში შემავალი კანონპროექტების მეორე მოსმენით წარდგენის დროს.

აღსანიშნავია, რომ ეს ინიციატივა საპარლამენტო უმრავლესობის ლიდერმა, ირაკლი კობახიძემ კანონპროექტის პირველი მოსმენით განხილვისას, პარლამენტის პლენარულ სხდომაზე შესთავაზა კოლეგებს. ინიციატივის თანახმად, სახელმწიფო ინსპექტორის სამსახურის საგამოძიებო და პერსონალურ მონაცემთა დაცვის დეპარტამენტების თანამშრომლების ახალ უწყებებში ავტომატურად დასაქმების საკითხი კანონით განისაზღვრება. მომხსენებელმა კოლეგებს ვრცელ საკანონმდებლო პაკეტში შეტანილი ცვლილებები გააცნო და სხდომაზე დამსწრე სამოქალაქო საზოგადოების წარმომადგენლების შეკითხვებსაც უპასუხა.

იურიდიულ საკითხთა კომიტეტის სხდომაზე ასევე მეორე მოსმენით, მუხლობრივად განიხილეს დაჩქარებული წესით მოთხოვნილი ის კანონპროექტები, რომლებიც პარლამენტმა დღევანდელი რიგგარეშე სესიის პლენარულ სხდომაზე პირველი მოსმენით მიიღო.

საგარეო ურთიერთობათა კომიტეტის თავმჯდომარემ, ნიკოლოზ სამხარაძემ „საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ“ კანონპროექტზე ისაუბრა, რომლის მიხედვითაც ევროპის კავშირის, ჩრდილოატლანტიკური ხელშეკრულების ორგანიზაციის, სხვა შესაბამისი საერთაშორისო ორგანიზაციის ოფიციალური სიმბოლოს ან შესაბამისი სახელმწიფოს ეროვნული სიმბოლოს შებღალვისთვის ადმინისტრაციული პასუხისმგებლობა შემოდის. საპროცედურო საკითხთა და წესების კომიტეტის თავმჯდომარის პირველმა მოადგილემ, გურამ მაჭარაშვილმა, კომიტეტის წევრებს „საჯარო დაწესებულებაში ინტერესთა შეუთავსებლობისა და კორუფციის შესახებ“ საქართველოს კანონში ცვლილების შეტანის თაობაზე“ კანონპროექტი გააცნო. საკანონმდებლო ცვლილებებით, რომელიც კომიტეტს პირველი მოსმენით მიღების შემდეგ უცვლელად წარედგინა, მუნიციპალიტეტის საკრებულოს ფრაქციის თავმჯდომარის მოადგილეს ქონებრივი მდგომარეობის დეკლარაციის შევსებას ავალდებულებს. მანვე კოლეგებს „საერთო სასამართლოების შესახებ“ საქართველოს ორგანულ კანონში ცვლილების შეტანის თაობაზე“ კანონპროექტი მუხლობრივად გააცნო. ცვლილებებით იუსტიციის უმაღლესი საბჭოს დაკომპლექტების წესი, დისციპლინური სამართალწარმოების პროცესში გადაწყვეტილებების მიღების პროცედურა, დისციპლინური გადაცდომებისა და სახდელების სახეებისა და დისციპლინური წარმოების განხილვის ვადებთან დაკავშირებული მთელი რიგი საკითხები და წესები ახლებურად ყალიბდება. ცვლილებების პროექტთან დაკავშირებით მოსაზრებები სახალხო დამცველის საპარლამენტო მდივანმა გამოთქვა და კანონპროექტის მთელი რიგ მუხლებზე დამატებითი განმარტებები მოითხოვა.

სხდომაზე, კომიტეტის თავმჯდომარის პირველმა მოადგილემ, დავით მათიკაშვილმა „საქართველოს ორგანულ კანონში „საქართველოს საარჩევნო კოდექსი“ ცვლილების შეტანის შესახებ“ საქართველოს ორგანული კანონის პროექტზე მუხლობრივად ისაუბრა, რომელიც, მისივე განმარტებით, საარჩევნო პროცესთან დაკავშირებულ გარკვეულ პროცედურულ საკითხებს აზუსტებს.

კომიტეტის სხდომაზე განხილულ საკითხებზე, რიგგარეშე სესიის 30 დეკემბრის პლენარულ სხდომაზე, მეორე და მესამე მოსმენით იმსჯელებენ.