დავით სერგეენკო: მიხეილ სააკაშვილის ჯანმრთელობის მდგომარეობის შესახებ ექიმებზე მეტ კომენტარს არაექიმები აკეთებენ - ადვოკატებმა, არაექიმებმა, ენთუზიასტებმა აცადონ მათ თავიანთი საქმის კეთება

მიხეილ სააკაშვილის რუსთავის მე-12 პენიტენციურ დაწესებულებაში გადაყვანის თაობაზე, კომენტარი დავით სერგეენკომ გააკეთა. ჯანდაცვის ყოფილი მინისტრისა და დეპუტატის თქმით, არავისთვის იყო მოულოდნელი, რომ სააკაშვილს, ჯანმრთელობის მდგომარეობის დასტაბილურების შემდეგ, სასჯელაღსრულების დაწესებულებაში გადაიყვანდნენ. კითხვაზე, რამდენად სტაბილურია ექსპრეზიდენტის ჯანმრთელობის მდგომარეობა, სერგეენკო ამბობს, რომ ამაზე შეფასებებს არა ადვოკატები, არამედ ექიმები უნდა აკეთებდნენ.

„მსჯავრდებული მიხეილ სააკაშვილი რომ სასჯელაღსრულების დაწესებულებაში დაბრუნდებოდა, სიურპრიზი არავისთვის უნდა ყოფილიყო, რადგან წინასწარვე იყო ცნობილი, რომ მას შემდეგ, რაც მისი ჯანმრთელობის მდგომარეობა დასტაბილურდებოდა, ის სასჯელაღსრულების დაწესებულებაში დაბრუნდებოდა. ეს არ იყო მოულოდნელი გადაწყვეტილება. გორის ჰოსპიტალში გადაყვანამდეც, თავისთავად ცხადი მოცემულობა იყო, რომ როგორც კი დასტაბილურდებოდა, უკან დაბრუნდებოდა. რაც შეეხება სტაბილიზაციას - მისი ჯანმრთელობის მდგომარეობა სტაბილური იყო თუ არა, ამაზე უამრავი ადამიანი, პროცენტულად, ბევრად მეტი არაექიმი აკეთებს განცხადებებს, ვიდრე - მისი მკურნალი ექიმები. მისმა მკურნალმა ექიმებმა ამის შესახებ უკვე გააკეთეს განცხადება. მე ჩემს კოლეგებზე ვსაუბრობ და დამერწმუნეთ, რომ არცერთ ექიმს არ მოუვა თავში აზრად, რომ პაციენტის მდგომარეობა ხელოვნურად დაამძიმოს ან შეამსუბუქოს. ასე რომ, ადვოკატებმა, არაექიმებმა, ენთუზიასტებმა აცადონ ექიმებს თავიანთი საქმის კეთება“, - აცხადებს დავით სერგეენკო.

საქართველოს მსჯავრდებული მესამე პრეზიდენტი გორის სამხედრო ჰოსპიტლიდან რუსთავის მე-12 სასჯელაღსრულების დაწესებულებაში გადაიყვანეს.

საქართველოს ყოფილი პრეზიდენტი 1-ელ ოქტომბერს დააკავეს.

მიხეილ სააკაშვილი სამი ინსტანციის სასამართლოს განაჩენით, დამნაშავედ არის ცნობილი ვალერი გელაშვილის ცემისა და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა ექვსი წლის ვადით. ასევე, მიხეილ სააკაშვილი ბრალდებულია ტელეკომპანია „იმედის“ დარბევის, 7 ნოემბრის დარბევისა და პატარკაციშვილების ქონების უკანონოდ დაუფლებისა და სახელმწიფო დაცვის სპეციალური სამსახურის კუთვნილი 9 024 367 ლარის პირადი მიზნებისთვის გაფლანგვის ფაქტებზე.