ვიქტორ ყიფიანი: ნატოს გაფართოებაზე რამე ამკრძალავი ვალდებულების საკუთარ თავზე აღება დასავლური წესწყობილების ძალიან მნიშვნელოვანი რევიზია იქნება, რაც წითელი ხაზია

ახლა ნატოს შემდგომ გაფართოებაზე რამე ამკრძალავი ვალდებულების საკუთარ თავზე აღება იქნება დასავლური წესწყობილების ძალიან მნიშვნელოვანი რევიზია და ეს ალბათ ის წითელი ხაზია, რომლის გადაკვეთის უფლებასაც დასავლეთი საკუთარ თავს ვერც მორალურად, ვერც რეპუტაციულად და ვერც პოლიტიკურად ვერ მისცემს, - ამის შესახებ „ჯეოქეისის“ დამფუძნებელმა ვიქტორ ყიფიანმა „ქრონიკის“ ეთერში ისაუბრა.

„საერთო ფონად ჩვენ ავიღოთ პრინციპი, რომ ნატოს განცხადებითა და ამერიკის შეერთებული შტატების განცხადებით ღია კარის პოლიტიკა ძალაში რჩება. ეს არის ჩემთვის უმთავრესი. ახლა როგორ შეიძლება ამ პრინციპის ფონზე შესაძლო კომპრომისების გადათამაშება. ვინც თვალყურს ადევნებს მოლაპარაკებებს, შენიშნავს, რომ იქ საუბარია რამდენიმე შესაძლო კომპრომისულ ვარიანტზე - შეიარაღებაზე კონტროლი, სამხედრო წვრთნებზე კონტროლი, საერთაშორისო ინფორმაციის უკეთ გაცვლის ახალი სისტემების დანერგვა. ამ საკითხებიდან გამომდინარე, შექმნილი კრიზისიდან გარკვეული კომპრომისული ვარიანტების მოძებნის საშუალება არსებობს. ამერიკის შეერთებული შტატები, რა თქმა უნდა, ძალიან რთულ ვითარებაშია, ეს სირთულე გამოიხატება რამდენიმე ელემენტში. პირველი, მათ არ უნდა გადააბიჯონ დათმობების მხრიდან იმ წითელ ხაზებს, რომლის იქით გადაბიჯებაც მათ არ ძალუძთ და ეს იქნება რეპუტაციულად ძალიან საზიანო. ამავე დროს, მათ რუსეთის ფედერაციას უნდა მისცენ საშუალება, რომ ისე გავიდნენ მათი აგორებული, ორგანიზებული კრიზისიდან, რომ სახე შეანარჩუნებინონ და მესამე მთავარი ელემენტი, რა ადგილს იპოვის ევროპა ამ ახალ ეკვილიბრიუმში ევროპის კონტინენტზე ამერიკის შეერთებულ შტატებსა და რუსეთის ფედერაციას შორის, ეს ალბათ ეუთოს მიერ გამართული მოლაპარაკების ფორმატში უნდა დავინახოთ, აი ამ ახალ ეკვილიბრიუმში ევროპის კონტინენტზე ამერიკის შეერთებულ შტატებსა და რუსეთის ფედერაციას შორის. ერთი სიტყვით, მე ვფიქრობ, რომ რუსეთის ფედერაციამ პროგრამა მინიმუმს ამ მოლაპარაკებების სახით მიაღწია. გემახსოვრებათ, რომ მას დიდი ბენზინგასამართი სადგური უწოდეს, რომელსაც ბირთვული იარაღი გააჩნია. რუსეთის ფედერაციამ დასავლურ ცნობიერებაში იმგვარი შემოტრიალება მოახდინა, რომ მისი დღის წესრიგი ყურადღების ეპიცენტრში მოექცა. ვფიქრობ, რომ ეს მათ უკვე საკმაოდ აკმაყოფილებს. რაც შეეხება კინეტიკურ დაპირისპირებასა და ფართომასშტაბიან ომს, ვფიქრობ, რომ ორივე კარგად აცნობიერებს, რომ ეს ის ზღვარია, რისი გადაბიჯების შემდეგაც პერსპექტივა არ არსებობს. ამ ახალი წონასწორობის წერტილისა და ახალი რკინის ფარდის მოძებნის შემთხვევაში, იმის შესახებ, თუ რომელ მხარეს აღმოვჩნდებით, ჩვენ შეგვიძლია ვიმსჯელოთ მხოლოდ იმ განცხადებებით, რაც გვესმის ამერიკელი და ევროპელი დიპლომატებისგან. ვფიქრობ, რომ ახლა ნატოს შემდგომ გაფართოებაზე რაიმე ამკრძალავი ვალდებულებების საკუთარ თავზე აღება იქნება დასავლური წესწყობილების ძალიან მნიშვნელოვანი რევიზია და ეს ალბათ ის წითელი ხაზია, რომლის გადაკვეთასაც დასავლეთი საკუთარ თავს ვერც მორალურად, ვერც რეპუტაციულად და ვერც პოლიტიკურად უფლებას და ნებას ვერ მისცემს“,- განაცხადა ვიქტორ ყიფიანმა.