რატი იონათამიშვილი: სააკაშვილი ვერ ეგუება იმ სიმშვიდეს და სტაბილურობას, რომელიც არის ქვეყანაში, ვერ ეგუება იმას, რომ „ქართული ოცნება“ არის ის ხელისუფლება, რომელმაც ორი ომი ააცილა ჩვენს ქვეყანას

ეს იყო განსაკუთრებულად ამორალური ნაწილი დღევანდელი მისი გამოსვლის, ვინაიდან ჩვენ გვახსოვს, რომ ის ახალგორს და იმ სოფლებს, იმ ისტორიულ ძირძველ ქართულ ტერიტორიებს, რომელიც ზუსტად 2008 წელს დავკარგეთ ჩვენ, ქვების ხროვას უწოდებდა, თანაც ამას კადრულობდა საერთაშორისო მედიასთან საუბრისას. მისგან განსხვავებით, ჩვენ ქვების გროვაც გვიყვარს ჩვენს ქვეყანაში, მიწის თითოეული გოჯი და ეს ქვეყანა გვიყვარს განურჩევლად იმისა, სად, რა კლიმატი და სად რა თვისებებია. დღეს გამოდის და კიდევ კადრულობს მსგავსი განცხადებები გააკეთოს, ნაცვლად იმისა, რომ ბოდიში მოუხადოს და მოინანიოს ჩვენი საზოგადოების წინაშე თუნდაც 2008 წელს ჩადენილი დანაშაულები, რითაც მან მთლიანად რეგიონში რუსეთი გააძლიერა, - განაცხადა პარლამენტის ფრაქცია „ქართული ოცნების“ თავმჯდომარემ, რატი იონათამიშვილმა „ქრონიკასთან“, რითაც უპასუხა კითხვას - რას ემსახურება ექსპეზიდენტის დღეს გაკეთებული განცხადება, რომ თითქოს „ივანიშვილის მმართველობის დროს საქართველომ დაკარგა სოხუმის და ცხინვალისხელა ტერიტორიები ერთი გასროლის გარეშე“.

„მიხეილ სააკაშვილი ვერ ეგუება იმ სიმშვიდეს და სტაბილურობას, რომელიც არის დღეს ჩვენ ქვეყანაში. ვერ ეგუება იმ სინამდვილეს, რომ „ქართული ოცნება“ არის ის ხელისუფლება, რომელმაც 2 ომი ააცილა ჩვენს ქვეყანას და ჩვენი ხელისუფლების პირობებში კონფლიქტს ადგილი არ ჰქონია, რაც ძალიან გულზე ხვდება როგორც მიხეილ სააკაშვილს ისე „ნაციონალურ მოძრაობას“ და ისინი მუდმივად ცდილობენ რომ რამენაირად მოახდინონ გარკვეული კონფლიქტების პროვოცირება, მოახდინონ პროცესების ესკალაციები და ფაქტია, რომ ისინი დღესაც ცდილობენ არამარტო საქართველოში, არამედ უკრაინაშიც გააძლიერონ რუსეთი და მათი „დესანტის“ წასვლა უკრაინაში ყოველთვის ამ საკითხებს ემსახურება, ისევე როგორც სააკაშვილის თავის დროზე იქ მოღვაწეობა“, - განაცხადა იონათამიშვილმა.

დეპუტატმა ასევე ისაუბრა მიხეილ სააკაშვილის ქონებაზე.

„საზოგადოებამ ძალიან კარგად იცის, რომ სხვადასხვა კონტინენტებზე სააკაშვილი ყიდულობს პენტჰაუსებს და აგროვებს ძვირადღირებულ, რამდენიმე ათეული მილიონის ღირებულების უძრავ ქონებას. ეს არის ფაქტი. ეს ფული არის ის თანხები, რომელიც კორუფციული გზებით არის თავის დროზე მოპოვებული და რომელიც წაართვეს საქართველოს და ჩვენს მოსახლეობას. ამ ადამიანებს არ აქვთ განცდა რომ რაიმე ჩაიდინეს, იქიდან გამომდინარე, რომ მათი ცხოვრების წესი იყო ეყვლიფა ჩვენი მოსახლეობა და ეყვლიფა საქართველოს ბიუჯეტი და საქართველოს ბიუჯეტი საკუთარი ოჯახის ბიუჯეტად ჩაეთვალათ. ფაქტი არის, რომ ამ ადამიანების ქონება ძალიან საეჭვოდ ათეულობით მილიონ დოლარს აღემატება და ალბათ კიდევ უფრო მეტია. საზოგადოება ძალიან კარგად ხედავს, ვინ როგორ გამოიყენა ხელისუფლებაში ყოფნა სათავისოდ“, - განაცხადა იონათამიშვილმა.