​საქართველოს საგარეო საქმეთა მინისტრის მოადგილე ნიდერლანდების პარლამენტში სიტყვით გამოვიდა

ჰააგაში ვიზიტისას, საგარეო საქმეთა მინისტრის მოადგილე, თეიმურაზ ჯანჯალია, ნიდერლანდების წარმომადგენელთა პალატის საგარეო ურთიერთობათა კომიტეტზე სიტყვით წარსდგა. სხდომას მმართველი კოალიციისა და ოპოზიციური პარტიების წარმომადგენლები ესწრებოდნენ, - ამის შესახებ ინფორმაციას საქართველოს საგარეო საქმეთა სამინისტრო ავრცელებს.

მათივე ინფორმაციით, თეიმურაზ ჯანჯალიამ ნიდერლანდელი პარლამენტარების შეკითხვებსაც უპასუხა.

მინისტრის მოადგილე კომიტეტის წევრებს, საქართველოს საგარეო პოლიტიკის პრიორიტეტებზე, რეგიონული უსაფრთხოების აქტუალურ საკითხებსა და გამოწვევებზე ესაუბრა.

სიტყვით გამოსვლისას, თეიმურაზ ჯანჯალიამ განიხილა რუსეთის პოლიტიკის შედეგად მთელ რეგიონში შექმნილი მწვავე კრიზისი და უსაფრთხოების დაძაბული გარემო. ასევე განიხილა რუსეთის დესტრუქციული ნაბიჯები და ქმედებები, რომლებიც მიმართულია საქართველოსა და უკრაინის სუვერენიტეტისა და ტერიტორიული მთლიანობის წინააღმდეგ. ხაზგასმით აღნიშნა უკრაინის მიმართ აშშ-ის, ევროკავშირისა და ნატო-ს კოორდინებული და კონსოლიდირებული პოზიციის მნიშვნელობა, რაც რუსეთის მიერ ოკუპირებულ ან ანექსირებულ ნებისმიერ ქვეყანაზე ვრცელდება და ამ ქვეყნებისთვისაც მხარდაჭერის ნიშანია.

მინისტრის მოადგილემ პარლამენტარებს საქართველოს საგარეო პოლიტიკის ძირითადი მიზნები და პრიორიტეტები გააცნო. ისაუბრა რუსეთ-საქართველოს კონფლიქტის მშვიდობიან მოგვარებაზე, საქართველოს ოკუპირებული ტერიტორიების არაღიარების პოლიტიკის უზრუნველყოფაზე, ქვეყნის სრულ დეოკუპაციაზე, იძულებით გადაადგილებულ პირთა და ლტოლვილთა საკუთარ სახლებში უსაფრთხო და ღირსეულ დაბრუნებაზე. ასევე, ხაზი გაუსვა საოკუპაციო ხაზებით გაყოფილ მოსახლეობას შორის შერიგებისა და ნდობის აღდგენის ხელშეწყობას, ადგილზე მდგრადი მშვიდობისა და უსაფრთხოების მიღწევას.

დეტალურად განიხილა საქართველოს ოკუპირებულ რეგიონებში უსაფრთხოების, ჰუმანიტარული და ადამიანის უფლებათა კუთხით არსებული რთული ვითარება. ყურადღება გაამახვილა რუსეთის მხრიდან განხორციელებულ უკანონო და პროვოკაციულ ქმედებებზე, მათ შორის, აფხაზეთისა და ცხინვალის რეგიონების დე-ფაქტო ანექსიის მიმართულებით მოსკოვის მიერ გააქტიურებულ ნაბიჯებზე, მზარდ მილიტარიზაციაზე, უკანონო სამხედრო წვრთნებზე, ასევე, რუსეთის მიერ საოკუპაციო ხაზის მავთულხლართებითა და ხელოვნური ბარიერებით გამაგრებაზე.

მინისტრის მოადგილემ ხაზი გაუსვა საქართველოს მოქალაქეების უკანონო დაკავებისა და გატაცებების პრაქტიკას და აღნიშნა მათი დაუყოვნებლივ გათავისუფლების აუცილებლობა. მიმოიხილა ჟენევის საერთაშორისო მოლაპარაკებების მიმდინარე პროცესი და რუსეთის მიერ საერთაშორისო ვალდებულებების, მათ შორის, 2008 წლის 12 აგვისტოს ცეცხლის შეწყვეტის შეთანხმების შესრულებაზე გაამახვილა ყურადღება. აღნიშნა, რომ რუსეთის მიერ საერთაშორისო ვალდებულებების შეუსრულებლობა და საერთაშორისო სამართლის პრინციპების უგულებელყოფა სერიოზულ საფრთხეს უქმნის არა მხოლოდ რეგიონის, არამედ მთლიანად ევროპულ და ევროატლანტიკურ უსაფრთხოებას.

თეიმურაზ ჯანჯალიამ პარლამენტარებს გააცნო საქართველოს ხელისუფლების პოლიტიკა და ძალისხმევა კონფლიქტის მშვიდობიანი მოგვარების მიმართულებით და ერთიან ეროვნულ, ინკლუზიურ პროცესზე ისაუბრა, რომელიც კონფლიქტის მშვიდობიანი გზით მოგვარების სახელმწიფო სტრატეგიის შემუშავებას ისახავს მიზნად.

მინისტრის მოადგილემ ისაუბრა საქართველოს ევროკავშირში გაწევრიანების შეუქცევად პროცესზე, როგორც ქართველი ხალხის ცივილიზაციურ არჩევანზე. დეტალური ინფორმაცია მიაწოდა ნიდერლანდურ მხარეს საქართველოს მიერ ასოცირების შეთანხმების განხორციელების კუთხით მიღწეული პროგრესის თაობაზე, ღრმა და ყოვლისმომცველი თავისუფალი ვაჭრობის სივრცის ჩათვლით. მათ შორის, ყურადღება გაამახვილა 2024 წელს ევროკავშირში სრულფასოვან გაწევრიანებაზე განაცხადის წარდგენის, ევროკავშირთან ფიზიკური დაახლოებისა და დარგობრივი თანამშრომლობის გაღრმავების მიმართულებით. აღნიშნა, რომ საქართველო ერთგულია ევროკავშირისა და იმ საერთო ფასეულობების, რომლებიც საქართველო-ევროკავშირის ურთიერთობებს უდევს საფუძვლად და რომ ეს პროცესი აქტიურად გაგრძელდება.

მიმოიხილა „აღმოსავლეთ პარტნიორობის“ ბოლო სამიტზე მიღებული პოლიტიკური დეკლარაციის მნიშვნელობა, რომელიც მოიცავს პარტნიორობის ახალ დღის წესრიგს, მათ შორის, ამბიციურ ეკონომიკურ და საინვესტიციო გეგმას.

თავის გამოსვლაში, მინისტრის მოადგილემ ხაზგასმით აღნიშნა, რომ ჩრდილოატლანტიკური ხელშეკრულების ორგანიზაციაში გაწევრიანება წარმოადგენს ქართველი ხალხის ურყევ ნებას და რომ საქართველო სრულად იზიარებს იმ პრინციპებსა და ღირებულებებს, რომლის გარშემოც არიან გაერთიანებულნი ალიანსის წევრი ქვეყნები. დასძინა, რომ ნატო-ს მისიებსა და ოპერაციებში აქტიური ჩართულობით საქართველო ადასტურებს საკუთარ მზაობას და შესაძლებლობას, ქმედითი წვლილი შეიტანოს საერთო ევროატლანტიკურ უსაფრთხოებაში.

თეიმურაზ ჯანჯალიამ ისაუბრა ნატო-საქართველოს თანამშრომლობის არსებული დინამიკის, მექანიზმებისა და ურთიერთობების განვითარების პერსპექტივებზე. ყურადღება გამახვილა შავი ზღვის უსაფრთხოების საკითხებზე და ამ მიმართულებით ნატო-საქართველოს თანამშრომლობის გაღრმავების მნიშვნელობაზე. აღნიშნა, რომ საქართველო, როგორც შავი ზღვის უსაფრთხოების არქიტექტურის განუყოფელი ნაწილი, გააგრძელებს ალიანსთან სტრატეგიულ დისკუსიებში მონაწილეობას და პრაქტიკულ თანამშრომლობას კონკრეტული ნაბიჯების შემუშავებისთვის.

ისაუბრა სამხრეთ კავკასიის რეგიონში უსაფრთხოების კუთხით არსებულ სიტუაციასა და გამოწვევებზე. აღნიშნა საქართველოს დაინტერესება რეგიონში გრძელვადიანი მშვიდობისა და სტაბილურობის უზრუნველყოფის კუთხით, მათ შორის, საქართველოს მთავრობის სამშვიდობო ინიციატივა და ხაზი გაუსვა რეგიონში დასავლელი პარტნიორების ჩართულობის გაძლიერების აუცილებლობას.

ნიდერლანდელმა პარლამენტარებმა ხაზი გაუსვეს საქართველოს მთავრობის როლს ავღანეთიდან უცხოელი მოქალაქეების ევაკუაციის პროცესში და მადლობა გადაუხადეს ქართულ მხარეს ავღანეთიდან ევაკუირებული ჰოლანდიელი მოქალაქეების სამშობლოში ეფექტიანად და შეუფერხებლად დაბრუნების პროცესში გაწეული დახმარებისთვის.