მაკა ბოჭორიშვილი: აბსოლუტური ტყუილია, რომ ოპოზიციას არ მიეცა ევრონესტის სხდომაში მონაწილეობის საშუალება

ჩვენს პარლამენტს აქვს რეგლამენტი, რომლის შესაბამისადაც განსაზღვრულია დელეგაციების შემადგენლობა. ამ დელეგაციებში, დადგენილი კვოტების შესაბამისად, არიან წარმოდგენილები ოპოზიციის წევრები. ევრონესტის დელეგაციაშიც გვყავს ოპოზიციონერები, როგორც ძირითად, ასევე სათადარიგო შემადგენლობაში. ასე რომ ეს არის აბსოლუტური ტყუილი, რომ მათ არ მიეცათ ევრონესტის სხდომაში მონაწილეობის საშუალება, - ამის შესახებ პარლამენტის ევროინტეგრაციის საკითხთა კომიტეტის თავმჯდომარემ, მაკა ბოჭორიშვილმა „ქრონიკის“ ეთერში განაცხადა.

მისივე თქმით, ოპოზიციის განცხადებები არის აბსოლუტურად უსაფუძვლო და პოპულისტური, რაც ძალიან აზიანებს ჩვენი ქვეყნის ინტერესებს.

„რისი გაკეთება შეუძლია დღეს საქართველოს ჩვენი მეგობარი ქვეყნისთვის? სადაც მიგვიწვდება ხმა, მათ აქტიურად დავუჭიროთ მხარი. შესაბამისად, ყველაზე მნიშვნელოვანია საერთაშორისო ფორმატები. არ ვიცი, თუ ვინმეს აქვს კითხვები იმასთან დაკავშირებით, რომ საერთაშორისო ფორმატებში ჩვენი დიპლომატები აქტიურად იცავენ უკრაინის პოზიციებს. გუშინ და გუშინწინ მოხდა სწორედ იმის დემონსტრირება თუ რა შეგიძლია გააკეთო შენი მეგობარი ქვეყნის მხარდასაჭერად. სამწუხაროდ, დელეგაციის არცერთი ოპოზიციონერი წევრი არ მონაწილეობდა ამ შეხვედრებში. მათ ჰქონდათ ამის შესაძლებლობა. მოდით ნუ დავიწყებთ წელთაღრიცხვას შარლ მიშელის დოკუმენტით - ჩვენს პარლამენტს აქვს რეგლამენტი, რომლის შესაბამისადაც განსაზღვრულია დელეგაციების შემადგენლობა. ამ დელეგაციებში, დადგენილი კვოტების შესაბამისად, არიან წარმოდგენილები ოპოზიციის წევრები. ევრონესტის დელეგაციაშიც გვყავს ოპოზიციონერები, როგორც ძირითად, ასევე სათადარიგო შემადგენლობაში. ასე რომ ეს არის აბსოლუტური ტყუილი, რომ მათ არ მიეცათ ევრონესტის სხდომაში მონაწილეობის საშუალება. პირიქით, პირადად მეც აქტიურად ვთხოვდი ოპოზიციონერ კოლეგებს, რომ ჩართულიყვნენ ამ მუშაობაში, ვინაიდან ვიცოდით, რამდენად მნიშვნელოვანი იქნებოდა რეგიონისთვის ეს შეხვედრა“, - განაცხადა ბოჭორიშვილმა.