გიორგი ამილახვარი: მტკიცებულებები უნდა წარმოადგინოს იმ მხარემ, რომელმაც პროვოკაციული ბრალი დასდო საქართველოს ხელისუფლებას

„მტკიცებულებები უნდა წარმოადგინოს იმ მხარემ, რომელმაც პროვოკაციული ბრალი დასდო საქართველოს ხელისუფლებას, ეს ჩვენი ძალიან პრინციპული მოთხოვნაა უკრაინის ხელისუფლებისადმი“, – განაცხადა საპარლამენტო უმრავლესობის წევრმა, გიორგი ამილახვარმა, პარლამენტში, ჟურნალისტებთან საუბრისას, უკრაინის საგარეო საქმეთა მინისტრის განცხადების პასუხად.

მისივე თქმით, საქართველოს შესაბამისმა უწყებებმა თხოვნით მიმართეს უკრაინულ მხარეს, რომ წარმოადგინონ მტკიცებულებები.

„ასეთი რამ ბუნებაში არ არსებობს. მიგვაჩნია, რომ ეს არის იმ ჰიბრიდული ომის ნაწილი, რომელსაც „ნაციონალური მოძრაობა“ ქვეყნის შიგნით აწარმოებს მისი ხელისუფლების, „ქართული ოცნების“ წინააღმდეგ. ეს ფარგლები არ ეყოთ, გასცდნენ საზღვრებს და ჩვენ ვვარაუდობთ, უკვე მათ წარმომადგენლებს უკრაინის ხელისუფლება შეჰყავთ შეცდომაში და უკრაინის ხელისუფლების ერთ-ერთი მნიშვნელოვანი უწყების ენით და სახელით გველაპარაკებიან, გვიყენებენ ამ ბრალდებას. მსგავსი არაფერი არ განხორციელებულა. პირიქით, ყველა ტვირთი, ყველა პირი და ყველა კომპანია, ვინც სანქციების ქვეშაა, ექვემდებარება უმკაცრეს კონტროლს სასაზღვრო გამშვებ პუნქტებზე, როგორც საპატრულო პოლიციის, ასევე საბაჟო სამსახურის და შესაბამის უწყებებს. მსგავსი არაფერი არ მომხდარა და არც მოხდება. მიგვაჩნია, რომ პირები, რომლებიც „ნაციონალური მოძრაობის“ წევრები არიან და დღეს უკრაინის ხელისუფლებაში თანამდებობები აქვთ, ეს ჰიბრიდული ომის ცეცხლი უკვე უკრაინიდან მათ მიერ არის გახსნილი“, - აღნიშნა გიორგი ამილახვარმა.

უკრაინის საგარეო საქმეთა მინისტრის, დმიტრო კულებას განცხადებით, საქართველომ ვერ დაამტკიცა, რომ რუსეთს სანქციების გვერდის ავლაში არ ეხმარება.