შალვა პაპუაშვილი: უკრაინაში ჩავდივართ არა ქართული პოლიტიკური სპექტრის ერთიანობისა და შიდა პოლიტიკური საკითხების საჩვენებლად, არამედ იმისთვის, რათა გავიზიაროთ ჩვენი ძმებისა და დების წუხილი

უკრაინაში ჩავდივართ პარლამენტის სახელით და არა პოლიტიკური ჯგუფების წარმომადგენლობის სახელით. რაც შეეხება დელეგაციის შემადგენლობას, ამას განვსაზღვრავთ, - ამის შესახებ პარლამენტის თავმჯდომარემ, შალვა პაპუაშვილმა განაცხადა.

მისი თქმით, უკრაინაში პარლამენტის დელეგაცია ჩადის არა ქართული პოლიტიკური სპექტრის ერთიანობისა და შიდა პოლიტიკური საკითხების საჩვენებლად, არამედ იმისთვის, რომ გაიზიაროს უკრაინელი ძმებისა და დების წუხილი,

„ზოგადად, პარლამენტის თავმჯდომარის ვიზიტის დროს დელეგაცია უნდა ასახავდეს პარლამენტის მოცემულობას, მათ შორის პროპორციას, რომელიც იქ არის. როდესაც მე მაქვს ვიზიტები, ოპოზიციის წარმომადგენლებიც არიან, თუმცა ისინი იქ ოპოზიციას კი არ წარმოადგენენ, არამედ არიან პარლამენტის ოპოზიციური წევრები. აქაც ეს შეთავაზება იყო, რომ იყოს უფრო თანაბარი წარმომადგენლობა, იგივე რაოდენობა იყოს ოპოზიციიდან, რაც იქნებოდა უმრავლესობის მხრიდან, ამ პრინციპს თუ გავყვებოდით, გამოდის 15-კაციანი დელეგაცია, რაც ლოჯისტიკური და უსაფრთხოების საკითხებიდან გამომდინარე და მათ შორის იქიდან გამომდინარე, რომ ეს იქნება ალბათ, ერთდღიანი ვიზიტი და ქმნის ლოჯისტიკურ სირთულეებს. რაც მთავარია, საჭიროებასაც ვერ ვხედავ. საუბარი იმაზე, თითქოს ამ დელეგაციის მიზანი არის ერთიანობის ჩვენება, ეს მიმაჩნია უადგილოდ. ჩვენ იქ ჩავდივართ არა ქართული პოლიტიკური სპექტრის ერთიანობისა და შიდა პოლიტიკური საკითხების საჩვენებლად, იქ ჩავდივართ, რათა გავიზიაროთ ჩვენი ძმებისა და დების წუხილი. ამის გაზიარება შეგვიძლია ამ დელეგაციის შემადგენლობაშიც და სხვა დელეგაციაშიც. ჩვენი პარლამენტის წევრები დადიან უკრაინაში და ამაზე პრობლემა არ არის. მათ ყოველთვის შეუძლიათ ჯგუფურად, თუ ინდივიდუალურად ჩავიდნენ და გამოხატონ თავიანთი პოზიცია.

რაც შეეხება პარლამენტის თავმჯდომარის ვიზიტს, ამას აქვს თავისი ფორმატი, მათ შორის დელეგაცია, როგორ უნდა ასახავდეს პარლამენტის შემადგენლობას, არ შეიძლება მრუდედ ასახავდეს ასახავდეს პარლამენტის შემადგენლობას, არის პროპორცია, რომელიც არის პარლამენტში და ეს არის შეთავაზება, რომელიც ნებისმიერი ასეთი დელეგაციის დროს იყო“, - განაცხადა შალვა პაპუაშვილმა.