მიხეილ სარჯველაძე Freedom House-ის მიერ გამოქვეყნებულ ანგარიშებს ეხმაურება

მიხეილ სარჯველაძე Freedom House-ის მიერ გამოქვეყნებულ ანგარიშებს ეხმაურება.

როგორც საპარლამენტო უმრავლესობის წევრმა ბრიფინგზე განაცხადა, ანგარიშში ყურადღებაა გამახვილებული იმ საფრთხეებზე, რაც რეგიონში რუსეთის მიერ წლების განმავლობაში განხორციელებულ სამხედრო აგრესიას უკავშირდება და ადგილი აქვს 2008 წლიდან, საქართველოში შეჭრიდან დაწყებული და უკრაინაში საომარი მოქმედებებით გაგრძელებული.

„ანგარიშში იკვეთება გარდამავალ ქვეყნებში დემოკრატიის ხარისხის გაუარესების ტენდენციებისა და უკანასკნელ წლებში რუსეთის მიერ მეზობელ სახელმწიფოებზე გავლენის მოპოვების აგრესიული ქმედებების ურთიერთკავშირი, რაც წარმოშობს რეგიონულ დონეზე, გარდამავალ ქვეყნებში დესტაბილიზაციის და ანტიდემოკრატიული პროცესების პროვოცირების საფრთხეებს. აღნიშნულ საფრთხეებზე, საქართველო წლებია, რაც არაერთ საერთაშორისო თუ ადგილობრივ პლატფორმებზე საუბრობს და მისასალმებელია, რომ დღეს, ამ საკითხზე საერთაშორისო საზოგადოების ყურადღების კონცენტრირებას ვადევნებთ თვალს.

მისასალმებელია, ანგარიშის რეკომენდაციების ნაწილი საქართველოს, უკრაინისა და მოლდოვის ევროინტეგრაციის დაჩქარებასთან დაკავშირებით, რაც ზემოხსენებული საფრთხეების გათვალისწინებით მეტ პასუხისმგებლობასა და მხარდაჭერას გულისხმობს ძლიერი დემოკრატიის სახელმწიფოების მხრიდან.

აუცილებლად უნდა აღინიშნოს, რომ ანგარიშში არის ცალკეული საკითხები, რომელთა ნამდვილობა და ობიექტურობა კითხვის ნიშნებს აჩენს კვლევის მეთოდოლოგიის გაუმჭვირვალობის, ანალიზის წყაროებისა და დახურული შერჩევის პრინციპების გამო, რაც შეუძლებელს ხდის საკითხზე მსჯელობის პერსპექტივას.

ფრიდომ ჰაუსის რეიტინგებში ქვეყნების გრადაცია საკამათო და არადამაჯერებელია. ასე მაგალითად, ფრიდომ ჰაუსის შეფასებით ურუგვაი უფრო თავისუფალი დემოკრატიაა ვიდრე ბელგია, შვეიცარია, ავსტრალია და გერმანია; ტუვალუ უსწრებს იტალიას, ჩეხეთს, სლოვაკეთს, ესპანეთს, აშშ-ს და საფრანგეთს; ვანუატუში, „როგორც ირკვევა“ უფრო უკეთესი თავისუფალი დემოკრატია სუფევს ვიდრე პოლონეთში, ბულგარეთში, ისრაელსა და უნგრეთში.

არის ანგარიშებში ერთი ფრაგმენტი, რომელიც ნამდვილად შეურაცხმყოფელი და ნებისმიერი ქართველისთვის დამამცირებელია, კერძოდ, ფრიდომ ჰაუსი თავის რეიტინგებში ე.წ. „ნაწილობრივ თავისუფალი“ დემოკრატიის კატეგორიაში განიხილავს უნგრეთის, მონტენეგროს, ჩრდილოეთ მაკედონიის და საქართველოს გვერდით აფხაზეთის საოკუპაციო რეჟიმს(!!!), ამ მართლაც რომ დესპოტურ რეჟიმს, რომელსაც მოკლული ჰყავს ათასობით უდანაშაულო მოქალაქე და გაძევებული ჰყავს ასიათასობით ჩვენ თანამემამულე მშობლიური მიწა-წყლიდან, სადაც ყოველდღიურად უხეშად ირღვევა ადამიანის უფლებები და თავისუფლებები, რაც რეალურად უნდა წარმოადგენდეს ფრიდომ ჰაუსის ანგარიშების ძირითად სამიზნეს. წარმოჩენილი მონაცემებით ფრიდომ ჰაუსი ფაქტობრივად ხდება ოკუპაციის და ეთნიკური წმენდის ერთგვარი დამკანონებელი რეჟიმის მოკავშირე და ოფიციალურად აცხადებს, რომ თურმე აფხაზეთის საოკუპაციო რეჟიმის ქვეშ უფრო უზრუნველყოფილია ადამიანის უფლებები, ვიდრე ნატოს წევრ თურქეთსა და მაგალითად ყაზახეთში. აფხაზეთი ამ ქვეყნებს რეიტინგში რამდენიმე ათეული საფეხურითაც კი უსწრებს“, - განაცხადა მიხეილ სარჯველაძემ.