არჩილ თალაკვაძე: კვლევითი ცენტრის ანგარიშში, რომლის ავტორები რადიკალური ოპოზიციის ლიდერებიც არიან, საუბარია იმაზე, თუ როგორ არ იმსახურებს საქართველო ევროკავშირის წევრობის კანდიდატის სტატუსს

თქვენ იცით კვლევითი ცენტრის ანგარიშის შესახებ, სადაც პირდაპირ არის საუბარი იმაზე, თუ როგორ არ იმსახურებს საქართველო კანდიდატის სტატუსს და რამდენად არასწორი იქნება ახლა საქართველოსთვის კანდიდატის სტატუსის მინიჭება. ჩვენ სააშკარაოზე გამოვიტანეთ, ვინ იყვნენ ის ადამიანები ვინც ეს დაწერეს და მათ შორის არიან წინა ხელისუფლების მაღალი რანგის ყოფილი თანამდებობის პირები და დღევანდელი რადიკალური ოპოზიციის ლიდერები, - ამის შესახებ პარლამენტის თავმჯდომარის მოადგილემ, არჩილ თალაკვაძემ „ქრონიკასთან“ განაცხადა. მისი თქმით, რადიკალური ოპოზიციის ამგვარი ქმედებები საქართველოსთვის დამაზიანებელია.

„როდესაც ქვეყანაში საპარლამენტო არჩევნები ტარდება და ადგილობრივი და საერთაშორისო სადამკვირვებლო ორგანიზაციები ამბობენ, რომ არჩევნები იყო კონკურენტული და ძირითადი წესების დაცვით ჩატარდა, როდესაც, ამის შემდეგ ოპოზიცია პარლამენტში შვიდი თვის განმავლობაში არ შემოდის და ბოიკოტს თუ საბოტაჟს ახორციელებს, ევროკავშირის გადმოსახედიდან ჩანს, რომ პარლამენტი ვერ ფუნქციონირებს სრულფასოვნად. ანუ, ამ ტიპის გადაწყვეტილება საქართველოს ევროინტეგრაციის გზაზე იყო დამაზიანებელი და ეს გააკეთა ოპოზიციამ 7 თვის განმავლობაში. მეორე: თქვენ იცით კვლევითი ცენტრის ანგარიშის შესახებ, სადაც პირდაპირ არის საუბარი, არგუმენტებია მოყვანილი, მათ შორის ბევრი ფაქტია დამახინჯებული და პირდაპირ ამ ანგარიშში წერია, თუ საქართველო როგორ არ იმსახურებს კანდიდატის სტატუსს და რამდენად არასწორი იქნება ახლა საქართველოსთვის კანდიდატის სტატუსის მინიჭება. ჩვენ სააშკარაოზე გამოვიტანეთ, ვინ იყვნენ ის ადამიანები ვინც ეს დაწერეს და მათ შორის არიან წინა ხელისუფლების მაღალი რანგის ყოფილი თანამდებობის პირები და დღევანდელი რადიკალური ოპოზიციის ლიდერები. „ნაციონალური მოძრაობა“ მარტო არ არის რადიკალურ ოპოზიციურ ბანაკში. ეს ჯგუფი ცდილობს, რომ როგორმე დაუბლოკოს ეს შესაძლებლობა [კანდიდატის სტატუსის მიღება] საქართველოს“, - აღნიშნა არჩილ თალაკვაძემ.

კითხვაზე, კონკრეტულად ვის მოიაზრებს აღნიშნულ ბანაკში, თალაკვაძე ასე პასუხობს:

„ამით არის დაკავებული „ლელოს“ არაერთი წარმომადგენელი, ამით დაკავებულია პოლიტიკური ოპოზიციის ის ნაწილი, რომელიც 7-თვიან ბოიკოტში იყო „ნაციონალური მოძრაობის“ გვერდით".