ბექა დავითულიანი: დღეს ჯერი არის ევროპაზე იმიტომ რომ ჩვენ ვაკეთებთ მაქსიმუმს - დასავლურმა სამყარომ უნდა აჩვენოს რომ არის პრინციპული და არ თმობს თავის ინტერესებს

რა თქმა უნდა დღეს ჯერი არის ევროპაზე იმიტომ რომ ჩვენ ვაკეთებთ მაქსიმუმს და დღეს ევროპამ უნდა მოიკრიბოს ძალა და უნდა თქვას გაბედულად მთელი მსოფლიოს, მათ შორის რუსეთის წინაშე - ეს რეგიონი ჩვენი ინტერესის სფეროა და ჩვენ მათ მოვიაზრებთ, როგორც ჩვენს მომავალ სრულუფლებიან წევრებს, - ამის შესახებ საპარლამენტო უმრავლესობის წევრმა ბექა დავითულიანმა „ქრონიკასთან“ განაცხადა.

მისი თქმით დასავლურმა სამყარომ უნდა აჩვენოს რომ არის პრინციპული და არ თმობს საკუთარ ინტერესებს.

„ეს ქვეყანა როგორც მინიმუმ უკანასკნელი 30 წელია მიისწრაფვის დასავლური და ევროპული ოჯახისკენ და ამ მისწრაფებებში გააკეთა ყველაფერი, რაც მართლაც ჩვენს ხელთ იყო. წარმოუდგენელი პროგრესი აქვს ამ ქვეყანას ევროპისკენ სწრაფვის მიმართულებით. რამაც დღეს დღის წესრიგში დააყენა საერთოდ კანდიდატის სტატუსის მოპოვება, ესაა რუსეთის უკრაინაში შეჭრა და რუსეთის უკრაინასთან ომი. 2024 წელს გეგმავდა „ქართული ოცნება“ განაცხადის გაკეთება და დაჩქარდა ეს პროცესი იმიტომ, რომ უკრაინაში არის ომი. 3 ომი გაქვს ასეთი ჩვენ გადატანილი. 3-ჯერ ვიომეთ რუსეთთან. ეს ხალხი და ეს საზოგადოება, თუ რაიმე ძალისხმევა, რაიმე სისხლი, რაიმეს გაღება იყო საჭირო ყველაფერს იღებს იმისთვის, რომ გახდეს ამ სამყაროს ნაწილი. შესაბამისად, რა თქმა უნდა დღეს ჯერი არის ევროპაზე იმიტომ რომ ჩვენ ვაკეთებთ მაქსიმუმს და დღეს ევროპამ უნდა მოიკრიბოს ძალა და უნდა თქვას გაბედულად მთელი მსოფლიოს, მათ შორის რუსეთის წინაშე, რომ ეს რეგიონი ჩვენი ინტერესის სფეროა და ჩვენ მათ მოვიაზრებთ, როგორც ჩვენს მომავალ სრულუფლებიან წევრებს და ჩვენს სრულმასშტაბიან ნაწილს. ეს თუ არ გააჟღერა ევროპამ და მკაფიო სიგნალი არ მისცა რუსეთს, ჩვენ სამწუხაროდ გვახსოვს, რა შედეგი მოჰყვა რუსეთის მხრიდან, როცა 1921 წელს ევროპამ უკან დაიხია და გავიდა კავკასიიდან, გვახსოვს 2008 წელს ბუქარესტის სამიტზე, როცა მაპის მონიჭების შეეშინდათ, უკან დაიხიეს, რა შედგები მოჰყვა. ამიტომ მინდა მჯეროდეს, რომ ამ შანსს ევროპა და დასავლეთი ხელიდან აღარ გაუშვებს და ნებისმიერი მიზეზი, იქნება ეს რეფორმა, რაიმე სფეროს გაუმართაობა მათი შეხედულებით, იქნება საბაბი და არა რეალური მიზეზი, იმიტომ რომ რეალური მიზეზი, რეალური კონტექსტი რაც განაპირობებს ჩვენი ევროპის ნაწილად ქცევა არის გეოპოლიტიკური. დღეს მიდის გეოპოლიტიკური ჭიდილი რუსეთსა და დასავლეთს შორის და დასავლურმა სამყარომ უნდა აჩვენოს რომ არის პრინციპული და არ თმობს თავის ინტერესებს“, - განაცხადა დავითულიანმა.