ედგარს რინკევიჩი: იმედი მაქვს, რომ ევროკომისიის მოსაზრებები კანდიდატის სტატუსის მინიჭების შესახებ სამივე ქვეყანაზე პოზიტიური იქნება

პირველ რიგში, ჩვენ ველოდებით ევროკომისიის დასკვნას. ძალიან მნიშვნელოვანია, რომ ორგანიზაციის წევრმა ქვეყნებმა იცოდნენ რეფორმების თვალსაზრისით, რომელი ქვეყანა სად დგას, - ამის შესახებ ედგარს რინკევიჩმა „იმედის კვირასთან“ ექსკლუზიურ ინტერვიუში ასოცირებული ტრიოს ქვეყნებისთვის კანდიდატის სტატუსის მინიჭებაზე საუბრისას განაცხადა. ლატვიის საგარეო საქმეთა მინისტრის თქმით, უკრაინას სპეციფიკური სიტუაცია აქვს, რადგან ქვეყანა დღეს რუსეთის აგრესიის მსხვერპლია და მას სოლიდარობა სჭირდება. მან ასევე რეფორმების თვალსაზრისით საქართველოსა და მოლდოვას პროგრესს გაუსვა ხაზი.

„მე ვიცი, რომ საქართველოს და მოლდოვას რეფორმების კუთხით პროგრესი აქვთ. რაც შეეხება ლატვიის პოზიციას, ჩვენ ავტომატურად არ მოვითხოვთ კანდიდატის სტატუსს სამივე ქვეყნისთვის, ვფიქრობთ რომ ეს დიდწილად იქნება დამოკიდებული ევროკომისიის დასკვნაზე. ლატვიაში მთავრობაში, პარლამენტში და საზოგადოებაში ფიქრობენ, რომ უკრაინას სჭირდება ახლა ეს ძლიერი პოლიტიკური სიგნალი. დებატები ევროპულ საბჭოში შედგება. ევროკავშირში არიან ქვეყნები, რომლებიც უკრაინის კანდიდატობას არ უჭერენ მხარს, რომ აღარაფერი ვთქვათ საქართველოსა და მოლდოვაზე. არიან ქვეყნები, რომლებიც ფიქრობენ, რომ დასავლეთ ბალკანეთის ქვეყნების გაწევრიანების პროცესი არ დასრულებულა. ძირითადი დებატები ამ საკითხზე ივნისის ბოლოს ევროპული საბჭოს სამიტზე შედგება. მსჯელობა იქნება ძალიან სერიოზული.

გადაწყვეტილებას სჭირდება კონსენსუსი. მაგალითად, თუ ერთი ქვეყანა და ამ შემთხვევაში უკრაინა გატეხს ყინულს, მაშინ, ვფიქრობ, დანარჩენ 2 ასოცირებულსაც მისცემს ამით შესაძლებლობას. რეფორმების თაობაზე ძალიან მნიშვნელოვანი შეფასება გაკეთდება. ტურინში შეხვედრაზე ამ თემაზე საქართველოსა და მოლდოვას საგარეო საქმეთა მინისტრებთან მოკლე შეხვედრისას საუბარი მქონდა. უკრაინისთვის პოლიტიკური გადაწყვეტილება მორალური ე.წ. ბუსტერი იქნება. უკრაინამაც უნდა იცოდეს, რომ კანდიდატის სტატუსი ავტომატურად ევროკავშირის წევრობისთვის აუცილებელი მოლაპარაკებებზე პროგრესს არ ნიშნავს. მოლაპარაკებების დაწყებასაც შეთანხმება სჭირდება. მე იმედი მაქვს, რომ ევროკომისიის მოსაზრებები იქნება პოზიტიური სამივე ქვეყანაზე. თუ კომისია ობიექტურად მიუთითებს ზოგიერთ საკითხზე, მაშინ უკრაინასთან, საქართველოსთან და მოლდოვასთან მეგობრობის მიუხედავად, კანდიდატის სტატუსს ვერ მოვითხოვთ“, - განაცხადა რინკევიჩმა.