ოლივერ ვარჰეი: ჩვენ გვინდა ვნახოთ, რომ საქართველოში პოლიტიკური პოლარიზაცია იკლებს, გვჭირდება თანამშრომლობა ყველა პოლიტიკური პარტიის მხრიდან

საქართველოსთან მიმართებით ჩვენ ასევე სრულყოფილი სია გვაქვს პრიორიტეტების, რომლის საფუძველზეც უნდა შეგვეძლოს შეთავაზების გაკეთება, რომ კანდიდატის სტატუსი მიენიჭოს ქვეყანას. ჩვენ გვინდა, რომ ვნახოთ ქვეყანაში პოლიტიკური პოლარიზაციის კლება, გვჭირდება თანამშრომლობა ყველა პოლიტიკური პარტიის მხრიდან, - ამის შესახებ გაფართოების საკითხებში ევროკომისარმა ოლივერ ვარჰეიმ ბრიუსელში გამართულ ბრიფინგზე განაცხადა, რომელზეც უკრაინის, მოლდოვას და საქართველოს განაცხადებთან დაკავშირებით ევროკომისიის დასკვნა წარმოადგინეს.

„ამ ძალიან ცვალებად დროში სამმა ქვეყანამ - უკრაინამ, მოლდოვამ და საქართველომ გადაწყვიტა გამოეგზავნა ძალიან მკაფიო გზავნილი ჩვენდამი. სამმა ქვეყანამ განაცხადა სურვილი, რომ ევროკავშირს შეერთდებოდნენ, მათ გამოხატეს ძალიან მკაფიოდ და ხმამაღლა თავიანთი სურვილი - ევროკავშირში გაწევრიანება, რომელიც ყველაზე მნიშვნელოვანია და ყველაზე სანდო იქნება მშვიდობისთვის, სტაბილურობისა და კეთილდღეობისთვის გრძელვადიან პერსპექტივაში. ახლა ევროპამ უნდა აჩვენოს, რომ ეს არის რეალობა, ამიტომ ბუნებრივია, რომ ახალი გეოპოლიტიკური კონტექსტი უნდა გადაისინჯოს რეალობის გაანალიზების მიზნით და პოლიტიკის შეფასების კუთხით. ჩვენ სამივე განაცხადი სერიოზულად განვიხილეთ, ეს ჩვენი ჩვეული საქმიანობა იყო. ძალიან ბევრს ვმუშაობდით და მაქსიმუმი გავაკეთეთ, რომ მაქსიმალურად შემჭიდროებულ დროში წარმოგვედგინა ჩვენი პასუხი საბჭოსადმი. ეს არის ჩვენი პირველი ნაბიჯი. კომისიამ მოამზადა დასკვნები განაცხადების საფუძველზე. ჩვენ ძალიან ძლიერი, სიღრმისეული ანალიზი ჩავატარეთ სამივე დოკუმენტის და გამოვიყენეთ ზუსტად იგივე მეთოდოლოგია, რასაც წინა შემთხვევებში ვიყენებდით. ჩვენ ვეყრდნობით იმ კრიტერიუმებს, რომელიც კოპენჰაგენის კრიტერიუმებით არის ცნობილი და 1995 წლიდან არსებობს, ასევე პოლიტიკური კრიტერიუმები, რომელიც გულისხმობს, როგორ უზრუნველყოფს ქვეყანა სამართლის უზენაესობას, ადამიანის უფლებების და უმცირესობების დაცვას. მეორე არის ეკონომიკური კრიტერიუმი - რამდენად ფუნქციონირებადია საბაზრო ეკონომიკა, რამდენად ძლიერია კონკურენტული გარემო. მესამეა საკანონმდებლო - რამდენად შეუძლია ქვეყანას გამოიყენოს და დანერგოს ჩვენი კანონმდებლობა ქვეყნის შიგნით.

მინდა განვმარტო კონსტრუქცია - რა პირობები ექნება კანდიდატის სტატუსს: მოლდოვის შემთხვევაში ნათელია - საჭიროა, საჯარო ადმინისტრირების რეფორმა გაგრძელდეს და დასრულდეს, გვჭირდება საჯარო ფინანსების მართვის სისტემა და საჯარო შესყიდვების სისტემის გაძლიერება. მოლდოვას ასევე სჭირდება სასამართლოს სისტემის რეფორმის განხორციელება. კორუფციასთან ბრძოლა - საჭიროა პროაქტიული და ძლიერი გამოძიება. თანამშრომლობა ევროკავშირთან და საერთაშორისო პარტნიორებთან უნდა გაძლიერდეს იმისთვის, რომ აქტივების ამოღება მოხდეს განსაკუთრებით საბანკო თაღლითური გარიგებების შემდეგ და პრიორიტეტები სწორად უნდა იყოს განსაზღვრული ფინანსური, საგამოძიებო და უკანონო შემოსავლების ლეგალიზების მიმართულებით. სამოქალაქო საზოგადოება, ადამიანების უფლებების დაცვა, ძალადობასთან ბრძოლა, ქალებთან მიმართებით უნდა გამოსწორდეს.

საქართველოსთან მიმართებით ჩვენ ასევე სრულყოფილი სია გვაქვს პრიორიტეტების, რომლის საფუძველზეც უნდა შეგვეძლოს შეთავაზების გაკეთება, რომ კანდიდატის სტატუსი მიენიჭოს ქვეყანას. ჩვენ გვინდა რომ ვნახოთ ქვეყანაში პოლიტიკური პოლარიზაციის კლება, გვჭირდება თანამშრომლობა ყველა პოლიტიკური პარტიის მხრიდან. ასევე რეკომენდაციები სასამართლო სისტემას ეხება, გვჭირდება წინსვლა კორუფციასთან ბრძოლის სფეროში. მეოთხე საკითხია ბრძოლა ორგანიზებულ დანაშაულებთან, უნდა იყოს ძლიერი გამოძიება ჩატარებული და საჭიროა პირნათელი მუშაობა. შემდეგია ფუნდამენტური უფლებების დაცვა - უნდა იყოს მედიის თავისუფლება, დამოუკიდებლობა გარანტირებული“, - განაცხადა ვარჰეიმ.