ალეკო ელისაშვილი: გუშინდელი დღე და სესიის ან დანიშვნა ან ჩაშლა პოლიტიკური ცანცარის გარდა რას ემსახურებოდა, სიმართლე გითხრათ არ ვიცი

გუშინდელი დღე და ამ სესიის ან დანიშვნა ან ჩაშლა პოლიტიკური ცანცარის გარდა რას ემსახურებოდა, სიმართლე გითხრათ არ ვიცი, - ამის შესახებ პარტია „მოქალაქეების“ ლიდერმა ალეკო ელისაშვილმა „ქრონიკის“ ეთერში განაცხადა.

მისი თქმით, ფსონზე ქვეყნის, შვილების მომავალი დევს და ამიტომ ყველა უფრო სერიოზულად უნდა მოეკიდოს საქმეს.

„მეუბნებიან ოპოზიციის ოპოზიცია ხარო, რა ვქნა, რასაც ვფიქრობ ის არ ვთქვა?! რა გამოუვიდა გუშინ ოპოზიციას?! იცი, რომ თუ „ქართული ოცნება“ არ შემოვიდა სხდომაზე, მაშინ ვერ გაიმართება. თუ „ქართულმა ოცნებამ“ არ გაგიღო დარბაზი, მაშინ სხდომა არ ჩატარდება. თან, ეუბნები მათ, რომ საკონსტიტუციო ცვლილებაზე ვიმსჯელოთო, თან პრესკონფერენციიდან ელაპარაკები იმიტომ, რომ პირისპირ ლაპარაკი არ გინდა და მერე ეუბნები, რომ აუცილებლად შემოდი და საკონსტიტუციო ცვლილებას მიეცი ხმაო. რაზეც იყო ლაპარაკი და ოპოზიციის ნაწილს რისი გატანაც უნდოდა, საკონსტიტუციო ცვლილებას 115 ხმა სჭირდება, ანუ, „ქართული ოცნება“ მხარს თუ არ დაუჭერს, ჩავარდება ეს საკითხი. რატომ აკეთებ ისეთ რაღაცებს, რომლიდანაც წინასწარ იცი, რომ გამარჯვებულ გამოვა „ქართული ოცნება“?! რატომ აკეთებ, რომ კიდევ აჩვენო რა მაგარი სუსტი ხარ?! ამიტომ ჩვენ და „გირჩმა“ არ მოვაწერეთ ხელი, როდესაც სესიის დანიშვნაზე იყო საუბარი. არ მეზარება მუშაობა, ის კი არა, რომ სიცხეა და სახლში მინდა წამოკოტრიალებული ვიყო. ვარ პარლამენტში, დავდივარ. იმის თქმა მინდა, რომ არ მეზარება ეს პროცესი, მაგრამ მეზარება შოუ. შოუ ყოველთვის უნდა ახლდეს თან პოლიტიკას, მაგრამ მარტო შოუ ხომ არ უნდა იყოს?! ფსონზე დევს ჩვენი ქვეყნის, შვლების მომავალი, ჩვენი წინაპრების ნაოცნებარი, რომ ახლა ევროკავშირის კანდიდატობა მივიღოთ, შემდეგ გავხდეთ ევროპის კავშირის წევრი, რაც გაგვამდიდრებს. ამ დროს ცანცარებ და რაღაცებს აკეთებ. არ მესმის, ცოტა მეტი სერიოზულობით მოვეკიდოთ საქმეს ყველა!“,- აღნიშნა ელისაშვილმა.