დევიდ მაკალისტერი: არასოდეს ყოფილა შემთხვევა, რომ ევროკავშირს, მის წევრ სახელმწიფოს ან ვინმე სერიოზულს ეთხოვა საქართველოსთვის ჩართულიყო ამ ომში. ეს სრული ნონსენსია

მოხარული ვარ, რომ ევროპულმა საბჭოს აღიარა საქართველოს ევროპული პერსპექტივა. ახლა მთავარია კითხვა - თუ მიენიჭება და როდის მიენიჭება საქართველოს კანდიდატის სტატუსი. საქართველოს წინ დიდი საშინაო დავალების შესრულება ელის, - ამის შესახებ საქართველოში ვიზიტით მყოფი ევროპარლამენტის დელეგაციის ხელმძღვანელმა, დევიდ მაკალისტერმა განაცხადა

„მოვუწოდებთ ამ ქვეყნის ყველა შესაბამის პოლიტიკოსს, მთავრობასა და ოპოზიციას, გადადონ პარტიული პოლიტიკა გვერდით და იმუშაონ იმ ძირითად საფუძველზე, თუ როგორ შეასრულონ ის 12 პირობა. დრო გვაქვს წლის ბოლომდე. ეს არს შეთანხმებული ვადა. ძალიან კარგი საუბრები გვქონდა გუშინ პარლამენტში, როგორც მმართველი პარტიის, ასევე ოპოზიციის წევრებთან, დღეს კი გავაგრძელებთ ჩვენ შეხვედრებსა და დიალოგს პრემიერ-მინისტრთან, საგარეო საქმეთა მინისტრთან, „ქართული ოცნების“ თავმჯდომარესთან. გვსურს ყველა თანამოსაუბრისგან მოვისმინოთ კონკრეტულად რას აკეთებენ იმისთვის რომ შეასრულონ ევროკომისიის მიერ ჩამოყალიბებული 12 პირობა, რომელიც ევროსაბჭომ დაამტკიცა. როდესაც საუბარი საგარეო საქმეებზეა, ევროკავშირში პოზიცია მკაფიოა - რუსეთის ომი უკრაინის წინააღმდეგ არის აბსოლუტურად გაუმართლებელი, უკანონო და ბარბაროსული აგრესია. ამიტომ ჩვენ მაქსიმალურ ზეწოლას ვახორციელებთ რუსეთის ფედერაციაზე და, მეორე მხრივ, მხარს ვუჭერთ უკრაინას. ასევე ვიწვევთ ყველა ჩვენს მეგობარსა და პარტნიორს, რომ შემოგვიერთდნენ ამ პოლიტიკაში“, - განაცხადა მაკალისტერმა.

მან კომენტარი საქართველოს ომში ჩათრევაზე გაკეთებულ განცხადებებზეც გააკეთა.

„არასოდეს ყოფილა შემთხვევა, რომ ევროკავშირს, წევრ სახელმწიფოს ან ვინმე სერიოზულს ეთხოვა საქართველოსთვის ჩართულიყო ამ ომში. ეს არის სრული ნონსენსი. პირიქით, ჩვენ გვსურს გამოვიყენოთ ყველა დიპლომატიური ხერხი, რომ მოვახდინოთ კრემლის რეჟიმზე ზეწოლა, რათა დაუყოვნებლივ შევაჩეროთ ომი და სრულად იყოს დაცული უკრაინის ტერიტორიული მთლიანობა და სუვერენიტეტი. და ბოლოს, საქართველომ იცის, რას ნიშნავს რუსეთის მხრიდან შემოჭრა. ჩვენ აქ ვართ იმისთვის, რომ ყურადღებით მოვისმინოთ ყველაფერი, გავესაუბროთ მმართველი პარტიის წარმომადგენლებს, გავიგებთ თუ რა კონკრეტული გეგმები აქვთ დეკემბრამდე. ჩვენ მზად ვართ ამ გზაზე მხარი დავუჭიროთ საქართველოს, თუმცა, საბოლოო ჯამში, რეფორმებზე მუშაობა და მათი განხორციელება დამოკიდებულია საქართველოს პარლამენტსა და მთავრობაზე.ცხადია, ეს საკითხი მხოლოდ მმართველ პარტიას არ ეხება“, - აღნიშნა მაკალისტერმა.

ევროპარლამენტარების შვიდკაციანი დელეგაცია საქართველოშია. დელეგაციას ევროპარლამენტის საგარეო ურთიერთობათა კომიტეტის თავმჯდომარე ხელმძღვანელობს. ორდღიანი ვიზიტის ფარგლებში უკვე გაიმართა შეხვედრა პრეზიდენტთან, პარლამენტის თავმჯდომარესთან, საპარლამენტო კომიტეტების თავმჯდომარეებთან, ოპოზიციასთან, მესამე სექტორთან და სახალხო დამცველთან.

დღეს დელეგაციის წევრები „ქართული ოცნების“ თავმჯდომარეს, საგარეო საქმეთა მინისტრსა და მთავრობის მეთაურს შეხვდებიან.