გურამ მაჭარაშვილი: პასუხგაუცემელი კითხვები აზიანებს საქართველო-აშშ-სა და საქართველო-ევროკავშირის ურთიერთობებს და მე ამ ყველაფრის თქმა გამიჭირდება, თუ დავრჩებოდი იმ პოზიციაზე, სადაც ვიყავი

პასუხგაუცემელი კითხვები აზიანებს საქართველო- აშშ-სა და საქართველო-ევროკავშირის ურთიერთობებს და მე ამ ყველაფრის თქმა გამიჭირდება, თუ დავრჩებოდი იმ პოზიციაზე, სადაც ვიყავი, - ამის შესახებ დამოუკიდებელმა დეპუტატმა გურამ მაჭარაშვილმა „ქრონიკის“ ეთერში განაცხადა. მისივე თქმით, „ქართული ოცნებიდან“ წასვლა მისთვის რთული ნაბიჯი იყო.

„ქართული ოცნების“ დაფუძნებიდან ვარ ამ პარტიის წევრი და როგორც აღმასრულებელი, ისე საკანონმდებლო მიმართულებით სხვა და სხვა თანამდებობაზე ბევრი გამოცდილება მივიღე. მაგრამ თუ ხარ პოლიტიკოსი, დგება მომენტი, როდესაც შეიძლება გადაწყვეტილება შენთვის არ იყოს კომფორტული. თუმცა, იყოს სახელმწიფოს უსაფრთხოებიდან და ინტერესებიდან გამომდინარე. სწორედ ეს მომენტი დადგა და ამიტომ მივიღე ეს გადაწყვეტილება“, - აღნიშნა მაჭარაშვილმა.

მან ასევე ისაუბრა იმ კითხვებზე, რომლებიც არსებობს და დამოუკიდებელ დეპუტატებს კიდევ დარჩათ დასასმელი.

„აქ საუბარი არ არის მხოლოდ ერთ-ორ ფაქტთან დაკავშირებით. ჩვენ გვაქვს ბევრი ინფორმაცია იმასთან დაკავშირებით, რომ როგორც ქვეყნის შიგნით, ისე გარეთ არსებობენ ძალები, რომლებსაც სურდათ და სურთ, რომ საქართველო მეორე ფრონტში ჩაითრიონ და თავიანთი სარგებელი რაც არის, ეს ყველამ კარგად იცის. აქედან გამომდინარე, ისიც, რომ ქალბატონ დეგნანისა და ბიძინა ივანიშვილის შეხვედრა საზოგადოებისთვის ერთი თვის განმავლობაში იყო კითხვის ნიშნის ქვეშ, იმას მიუთითებს, რომ საზოგადოებამ უნდა იცოდეს სწორი და საჭირო ინფორმაცია. ჩვენ ვფიქრობთ, რომ არცერთ შემთხვევაში, ჩვენი არცერთი განცხადება არ იქნება მიმართული საქართველო-აშშ-სა და საქართველო-ევროკავშირის ურთიერთობების დასაზიანებლად. ჩვენ ეს ნაბიჯი სწორედ იმიტომ გადავდგით, რომ ასეთი პასუხგაუცემელი კითხვები აზიანებს ან შეიძლება დააზიანოს საქართველო-აშშ-სა და საქართველო-ევროკავშირის ურთიერთობები. ამ ყველაფრის თქმა მე, როგორც ხელისუფლების წარმომადგენელს გამიჭირდებოდა, თუ დავრჩებოდი იმ პოზიციაზე, სადაც ვიყავი. რა თქმა უნდა, იქაც ვამბობდი და ვაფიქსირებდი პრინციპულ პოზიციას, მაგრამ არსებობს გარკვეული პოლიტიკური კონიუნქტურა, წესები, რომლის მიხედვითაც ხელისუფლებას უნდა ჰქონდეს ძალიან ბევრი შესაძლებლობა და დიპლომატიური გასასვლელი ქვეყნებთან ურთიერთობაში. ამ შეხვედრის დადასტურების შემდეგ ბუნებრივია საზოგადოებაში ჩნდება კითხვები, თუ რაზე იყო ამ შეხვედრაზე საუბარი“,- აღნიშნა მაჭარაშვილმა.