გიორგი კალანდარიშვილი: მეორედ არჩევისას მე მრავალპარტიული მხარდაჭერა მქონდა. შესაბამისად, ამ ეტაპზე იმაზე აპელირება, რომ პოლიტიკური კონსენსუსი არ იარსებებდა, ბუნებრივია, საფუძველს მოკლებულია

ბოლო კვირების განმავლობაში ჩვენ ვნახეთ მთელი რიგი პოლიტიკური ზეწოლისა და წნეხისა იმის თაობაზე, რომ ეს შესარჩევი კონკურსი და პროცესი შეჩერებულიყო, ან ჩავარდნილიყო, რომ ის თითქოს, ფორმალურ ხასიათს ატარებდა, - ამის შესახებ ცესკოს თავმჯდომარემ, გიორგი კალანდარიშვილმა პრეზიდენტზე საუბრისას განაცხადა.

მან ცესკოს თავმჯდომარის თავმჯდომარეობის კანდიდატთა შერჩევის პროცესი შეაფასა.

„ფაქტობრივად, ჩვენი მოლოდინი გამართლდა იმასთან დაკავშირებით, რომ ამ ყველაფრის მიღმა იყო პოლიტიკური მოტივი და გადაწყვეტილება, რაც პირველ რიგში, ინსტიტუციას პოლიტიკური დარტყმების ქვეშ აყენებს. კარგად ვნახეთ, რომ ამ გადაწყვეტილებამ მთელი რიგი პოლიტიკური ინსინუაციები გამოიწვია. აქედან გამომდინარე, ვფიქრობ, ასეთი გადაწყვეტილებები მნიშვნელოვნად საფრთხილო და ფაქიზია იმისთვის, რომ ინსტიტუცია ასეთი ტიპის დარტყმების ქვეშ არ დადგეს.

პირველ რიგში, რა თქმა უნდა, ჩემთვის მიუღებელია ის გარემოება, რომ დასახელდა პოლიტიკური კონსენსუსის არარსებობა კანდიდატთა მიმართებაში მაშინ, როდესაც ზოგადად, კონსენსუსის საკითხი და გადაწყვეტილების საკითხი ეს უკვე საკანონმდებლო ორგანოს კომპეტენციის ნაწილია და იქ მიიღება ასეთი ტიპის გადაწყვეტილება. მით უმეტეს, იმ ფონზე, პირადად ჩემს შემთხვევაში, მხარდამჭერთა რაოდენობა დინამიკაში თუ შევხედავთ, ეს აბსოლუტურად მზარდი იყო. მეორე არჩევისას მე მრავალპარტიული მხარდაჭერა მქონდა. შესაბამისად, ამ ეტაპზე იმაზე აპელირება, რომ პოლიტიკური კონსენსუსი არ იარსებებდა, ბუნებრივია, საფუძველს მოკლებულია.

ვფიქრობ, ამ ყველაფერს წინ უძღოდა ის, რომ ბოლო კვირების განმავლობაში ჩვენ ვნახეთ მთელი რიგი პოლიტიკური ზეწოლისა და წნეხისა იმის თაობაზე, რომ ეს შესარჩევი კონკურსი და პროცესი შეჩერებულიყო, ან ჩავარდნილიყო, რომ ის თითქოს, ფორმალურ ხასიათს ატარებდა და ამ შემთხვევაში, ასეთი ტიპის ზეწოლებსაც ჰქონდა გარკვეული ტიპის გავლენა ამ გადაწყვეტილებაზე. ვერ ვიტყვი რა გავლენის ქვეშ მოექცა, უხერხულია, ამაზე საუბარი, თუმცა ერთი ისაა, რომ პოლიტიკური გადაწყვეტილება იყო მიღებული“, - განაცხადა კალანდარიშვილმა.

საქართველოს პრეზიდენტის სალომე ზურაბიშვილის განცხადებით, ცესკოს თავმჯდომარედ და წევრად მუდმივად ერთიდაიგივე კანდიდატურების წარდგენა და მათი მხოლოდ 6 თვის ვადით არჩევა, ამ ინსტიტუტის გაძლიერებასა და განვითარებას ხელს არ უწყობს.

მანამდე სალომე ზურაბიშვილმა ცესკოს თავმჯდომარის თანამდებობაზე საქართველოს პარლამენტს ასარჩევად წარუდგინა თამარ ალფაიძისა და რევაზ ეგაძის, ხოლო ცესკოს წევრის ერთ თანამდებობაზე - ქრისტინე ქაჯაიასა და ლევან ისაკაძის კანდიდატურები.