ანრი ოხანაშვილი: სამოქალაქო საზოგადოების წარმომადგენლების მხრიდან დასახელდა საპროკურორო ფუნქციის დამატება სპეციალური საგამოძიებო სამსახურისთვის, მზად ვართ, ვიმსჯელოთ

ჩვენ სამუშაო ჯგუფის ფარგლებში დავიწყეთ საკითხების იდენტიფიცირება. სუბიექტებს, ვინც სამუშაო ჯგუფში არიან წარმოდგენილები, ვის რა მიაჩნია გამოწვევად. ყველამ დასვა კონკრეტული წინადადება. ამ წინადადებებთან დაკავშირებით ჩვენ მომდევნო შეხვედრაზე გვექნება უკვე საგნობრივი დისკუსია და სიღრმისეული განხილვა, – ამის შესახებ იურიდიულ საკითხთა კომიტეტის თავმჯდომარემ, ანრი ოხანაშვილმა განაცხადა.

მისი თქმით, შეხვედრაზე დასახელდა რამდენიმე საკითხი განიხილეს.

„დასახელდა სპეციალური საგამოძიებო სამსახურის წარმომადგენლების მხრიდან დასახელდა, რომ ისინი მზად არიან და მათი სამსახური შეძლებს, რომ სამსახურის საქმიანობის მანდატი გაფართოვდეს ევროპულ კონვენციასთან მიმართებაში. ასევე, პერსონალური მონაცემების დაცვის სამსახურის მხრიდან გაჟღერდა პერსონალურ მონაცემთა დაცვის ახალ კანონთან დაკავშირებით ინტენსიური მუშაობის გაგრძელების სურვილი. სამოქალაქო საზოგადოების წარმომადგენლების მხრიდან დასახელდა საპროკურორო ფუნქციის დამატება სპეციალური საგამოძიებო სამსახურისთვის. ორივე სამსახურის ხელმძღვანელის არჩევასთან დაკავშირებით, როგორც ცალკეული ოპოზიციური პარტიის მხრიდან, ასევე სამოქალაქო საზოგადოების წარმომადგენლების და სახალხო დამცველი წარმომადგენლის მხრიდან გაჟღერდა პოზიცია, რომ ორივე სამსახურის ხელმძღვანელის პარლამენტში არჩევისთვის კვორუმი გადაიხედოს. მათი შემოთავაზებაა რომ 76 ხმაზე მეტი იყოს, 90 ან 100 ხმა. სხვადასხვა ვერსია გაჟღერდა. პარტია „საქართველოსთვის“ წარმომადგენელმა შალვა კერესელიძემ აღნიშნა, ამ სამსახურების ხელმძღვანელების ხმათა 2/3 არჩევა მიაჩნია სწორად. ეს საკითხიც განხილვის საგანი იქნება“, – განაცხადა ოხანაშვილმა.

სპეციალური საგამოძიებო და პერსონალურ მონაცემთა დაცვის სამსახურების ინსტიტუციური გაძლიერების საკითხზე პარლამენტში პირველი სამუშაო შეხვედრა დასრულდა. კანონპროექტის ინიცირება 19 ოქტომბრამდე იგეგმება და მისი მიზანი სამსახურების ეფექტიანი და მეტად დამოუკიდებელი საქმიანობაა.